Apple Watch сипаттамаға сәйкес келмеді: Петропавл соты сатушыны ақшаны қайтаруға және сатып алушыға өтемақы төлеуге міндеттеді

Петропавл қаласының №2 сотына тұрғынның мүддесін қорғау мақсатында «Тұтынушылар мен кәсіпкерлер құқықтарын қорғау қауымдастығы» Солтүстік Қазақстан қоғамдық бірлестігі келісімді бұзу, материалдық шығынды өтеу, айыппұл мен моральдық зиянды өндіру туралы талап арызбен жүгінді, деп хабарлайды QZ News.

Талап арызда П. жауапкерден 175 820 теңгеге Apple Watch смарт-сағатын сатып алғаны көрсетілген. Алайда, кейіннен тауардың сипаттамада көрсетілген талаптарға сай келмейтіні анықталған, сондықтан талапкер сатып алынған өнімді пайдалана алмаған.

«Сот отырысында талапкердің дәлелдері расталды. Істі қарау барысында сатылған тауардың көрсетілген сипаттамаларға сәйкес келмейтіні анықталды. Тауар сипаттамасында смарт-сағаттар iPhone 9 және одан жоғары нұсқаларымен үйлесімді деп көрсетілген, ал талапкердің телефоны – iPhone 16 нұсқасы. Алайда, смарт-сағатты қосу кезінде ол iPhone 17 және одан жоғары нұсқасын талап еткені анықталды», – делінген Петропавл қаласының №2 сотының хабарламасында.

Сот жауапкер ұсынған тауар туралы ақпараттың, дүкен платформасында орналастырылған мәліметтердің шындыққа сәйкес келмейтінін анықтады. Сот талапкердің талаптарын қанағаттандырды, жасалған сатып алу-сату келісімі бұзылды. Жауапкерден талапкердің пайдасына 175 820 теңге мөлшеріндегі шығын сомасы, 175 820 теңге айыппұл және 50 000 теңге моральдық зиян өндірілді. Шешім заңды күшіне енді.