Белов мектебінің оқушылары уақытша Пеньково мектебінде білім алатын болады

23 наурыз күні Белов мектебінің тарих кабинетінде төбе салбырап қисайған, оның себебі шатырдағы арқалықтың деформациялануы болды. Балалардың қауіпсіздігін қамтамасыз ету мақсатында 3 сәуірден бастап оқушыларды күнделікті Пеньково орта мектебіне тасымалдау туралы шешім қабылданды. Бұл туралы СҚО білім басқармасы хабарлады, деп жазады QZ News.

Белов орта мектебі 60 жыл бұрын салынған. 2022 жылы техникалық тексеруден өткен, апаттық жағдай анықталмаған.

Мектепте барлығы 116 бала оқиды. Каникул кезінде, 23 наурызда, бір кабинеттің төбесінде шатыр арқалығының деформациясына байланысты төбе салбырай бастаған

«Балалардың қауіпсіздігін қамтамасыз ету мақсатында 3 сәуірден бастап оқушыларды Пеньково орта мектебіне (5 км) күнделікті тасымалдау ұйымдастырылады. Сабақ штаттық режимде жалғасады. Тасымалдауға 3 көлік жұмылдырылады (16 орынды 2 газель, 22 орынды 1 автобус). Сабақ екінші ауысымда (13:30 – 18:15) өткізіледі. Пеньково орта мектебінің жобалық қуаттылығы – 320 оқушы. Қазіргі уақытта онда 185 оқушы білім алуда», – деп мәлімдеді білім басқармасы.

Сондай-ақ, Қызылжар ауданының білім бөлімі мектеп ғимаратына техникалық тексеру жүргізу және тиісті қорытынды беру үшін «Стадия» ЖШС мамандандырылған ұйымымен келісімшарт жасасқаны хабарланды.