Халықаралық «Преображение» байқауында солтүстікқазақстандық «Дружные ребята» ансамбліне Гран-при бұйырды

Санкт-Петербургте өткен «Преображение» – «Көктем мерекесі» атты өнер мен шығармашылықтың халықаралық конкурс-фестивалінде «Дружные ребята» ансамблі «Халық билері» номинациясы бойынша Гран-приді жеңіп алды. Байқауға Ресей, Өзбекстан және Қазақстаннан 35 шығармашылық ұжым қатысты, деп хабарлайды QZ News.

Қазақстанның намысын Петропавлдың «Дружные ребята» атты үлгілі хореографиялық ансамблі қорғады. Би ұжымы төрт халық биін орындап, олардың үшеуі І дәрежелі дипломға – «Беспризорники», «Чебатуха», «Казачий пляс», ал біреуі ІІ дәрежелі дипломға – «Жайлауда» ие болды.

Қатысушылар арасындағы жоғары бәсекелестікке қарамастан, солтүстікқазақстандық жас бишілердің өнері қазылар алқасының жүрегін жаулап алды. Гала-концертте «Дружные ребята» ансамблі «Халық билері» номинациясында ең жоғары марапат – Гран-приді иеленді.

«Бұл сапар ансамбль жетекшісі Сучкова Расима Мұхарлямқызы мен оның кәсіби командасының, атап айтқанда Макина Ботагөз Болатқызы, Жұмажанов Самат Ералыұлы және басқа да ұжым мүшелерінің еңбегі мен сүйіспеншілігінің арқасында мүмкін болды. Сондай-ақ, «Дружные ребята» ұжымының ата-аналарының қаржылық қолдауы үлкен рөл атқарды. Өйткені бұл – шынымен де жаңа белестерді бағындыруға дайын тату бір біртұтас отбасындай», – делінген хабарламада.