Павлодарлық полицейлер жолда тоңып қалған СҚО тұрғындарына көмек көрсетті

Павлодар облысы полиция департаментінің бастығы Василий Склярдың атына Солтүстік Қазақстан облысы Құлыкөл ауылының тұрғыны Әубәкіров Ғалымбектен учаскелік полиция инспекторы Қабиев Асхатқа және табиғат қорғау полициясының инспекторы Саянов Азаматқа алғыс хат келіп түсті, деп хабарлайды QZ Media тілшісі.

СҚО тұрғындарының айтуынша, олар Ертіс ауылынан Құлыкөл ауылына бара жатқан, жолда боран басталыпты. Мұнымен қоймай, Ертіс ауылы мен Панфилов ауылы арасындағы тас жолда көлік бұзылған. Ал зымыранша зулаған өзге көліктердің ешқайсысы тоқтаған.

“Көлік іске қосылмады, біз әбден тоңып қалдық. Біздің бақытымызға орай, көмек ұсынған полиция қызметкерлері өтіп бара жатты. Автокөлікті тексеру кезінде көліктің күрделі бұзылғаны белгілі болды, көлікті орнында жөндеу мүмкін болмады. Полицейлер көлікті сүйреп апарып, бізді жақын маңдағы ТҚС жеткізді. Жанымыздан өтіп кетпеген полицейлерге көп рақмет, бізді не күтіп тұрғанын білмедік. Ержүрек полицейлерге табыс, зор денсаулық тілеймін”, – деп жазады Ғалымбек Бақайұлы.