Петропавлда Тәуелсіздік стеласына гүл шоқтары қойылды

Желтоқсанның 16-шы жұлдызында Қазақстан Республикасының Тәуелсіздік күніне орай СҚО әкімі Ғауез Нұрмұхамбетов Тәуелсіздік стеласына гүл шоқтарын қойды, деп хабарлайды QZ Media тілшісі.

СҚО әкімі әлеуметтік желі арқылы өңір халқын Тәуелсіздік күнімен құттықтады.

“Құрметті солтүстікқазақстандықтар! Сіздерді Қазақстан Республикасының Тәуелсіздік күнімен шын жүректен құттықтаймын. Еліміздің бостандығын аңсаған ата-бабаларымыз бен  отанымыздың еркіндігі үшін күрескен азаматтарды еске алып, тағзым ету – біздің ұлы парызымыз. Олардың еліне деген кіршіксіз махаббаты – өскелең ұрпаққа нағыз үлгі. Көк байрағы желбіреген, абыройлы да айбынды, беделді де берекелі, ынтымағы мен бірлігі жарасқан еліміздің тәуелсіздігі баянды болғай. Әр отбасыға игілік пен бақыт, бақ-дәулет, ырыс тілеймін. Қазақстанның дамуы жолындағы еңбектеріңіз табысты, барлық бастамаларыңыз сәтті болсын!”, – деп жазды облыс әкімі Ғауез Нұрмұхамбетов.

Сонымен қатар, Тәуелсіздік стеласына гүл шоқтары қойылды. Рәсімге мемлекеттік органдардың басшылары, ардагерлер, депутаттар және қоғам өкілдері қатысты. Шараға қатысушылар егемендік үшін күрескен ұлттық қаһармандарға тағзым етіп, бір минут үнсіздікпен еске алды.