Петропавлда “Таң Шолпан” өңірлік байқауы өтті

Петропавлда 14-ші рет “Таң Шолпан” облыстық вокалистер байқауы өтті. Қозыбаев университетінде ұйымдастырылған іс-шара нағыз таланттарды жинады, деп хабарлайды QZ Мedia тілшісі.

“Байқау жыл сайын өтеді. Біз оны университеттің тәрбие және әлеуметтік жұмыс департаментінің қолдауымен өткіземіз. 50-ге жуық қатысушы бақ сынауға ниет білдірді, оның ішінде онлайн өнер көрсететіндер де бар. Жас әртістер әндерді 6 тілде орындайды”, – деді Қозыбаев Университеті “Музыкалық пәндер” кафедрасының профессоры Галина Колесникова.

Байқау екі номинация бойынша өткізілді: жеке орындау және халықтық және эстрадалық ән айту бағыттары бойынша ансамбль-дуэттер. Байқауға университет және колледж студенттері, сондай-ақ облыс мектептерінің оқушылары мен түлектері қатысты.

“Мен Адельдің “Set fire to the rain” әнін орындадым. Бірнеше апта бойы дайындалдым. Бала кезімнен ән айтамын, сахнаға шыққанды жақсы көремін”, – деді байқауға қатысушы Ғаухар Сағыныш.

Мықтыларды кәсіби қазылар алқасы анықтайды. Мүмкін, бұл байқау кейбір қатысушылар үшін шығармашылықтың трамплин болады және жаңа таланттарды ашуға көмектеседі.