Петропавлдағы Болатбаев көшесінде құбыр жарылды

19 қаңтар күні таңертең қалада ел күтпеген жаңалық жарияланды. Жергілікті парақшаларда көшелердің бірін су басқан видео тарады, деп хабарлайды QZ Мedia тілшісі.

Қалалық ТҮКШ бөлімі видеоға бірден түсініктеме берді. Ақпарға сүйенсек, таңғы 4.00-де Болатбаев көшесі 22/1 мекенжайы бойынша сумен жабдықтау құбыры жарылған.

“Коммуналдық қызметтердің күшімен 2 сағат ішінде жағдай тұрақталды. Қазіргі уақытта учаскені механикаландырылған тазалау және құм-тұз қоспасын себу жұмыстары жүргізілуде”, – делінген хабарламада.

Сондай-ақ, “Қызылжар СУ” ЖШС тиісті жұмыстар 6:30-да аяқталғанын хабарлады.

“Апатты жою кезеңінде 14 көппәтерлі үй сусыз қалды – Болатбаев 2, 2А, 4, 28, 28Г, 30, 32; 4 Линия көшесі 16; Назарбаев 327А, 327Б, 339, 347, 349, 351 және 7 ұйым”, – деп атап өтті компания өкілдері.