Петропавлдағы колледж студенттері Екатеринбургтегі ақылы тәжірбие кезінде 200 000 теңге жалақы алды

Бәйкен Әшімов атындағы Петропавл машина жасау және көлік колледжінің жастары “Ресей темір жолы” ААҚ Свердловск дирекциясына қарасты филиалдың құрылымдық бөлімшелеріне өндірістік-технологиялық практикадан өту үшін барды. Білім ұясы “Темір жолдың тартқыш жылжымалы құрамын пайдалану, жөндеу және техникалық қызмет көрсету” мамандығы бойынша 4 курста оқитын 10 студентін жіберді. Тәжірибе Екатеринбургте оқу орындары арасындағы ынтымақтастық шарты аясында өтті, деп хабарлайды QZ Мedia тілшісі.

Облыстық білім басқармасының мәліметінше, суденттер ақылы жұмыс орындарында тәжірибеден өтті, жатақханада тегін тұрумен, межелі жерге дейін тегін қатынаумен және әлеуметтік қолдау шараларының тізбесімен қамтамасыз етілді. Студенттердің ай сайынғы еңбекақысы 200 мың теңгені құрады.

Практикадан өту кезеңінде, яғни 2024 жылғы 12 қаңтар мен 5 наурыз аралығында студенттер “Ресей темір жолы” ААҚ Свердловск дирекциясының филиалында “5-разрядты вагондарды тексеруші-жөндеуші” жұмыс біліктілігі куәлігін де алды, кәсіби даярлықтан өтті. Қазіргі таңда, 2024 жылғы 13 ақпаннан 22 маусымға дейін осы колледждің 9 студенті аталған кәсіпорында ақылы өндірістік-технологиялық практикадан өтуде.