Петропавлдық есірткі жасырушы 10 жылға темір торға тоғытылды

34 жастағы петропавлдық есірткіні таратқаны үшін биылғы жылдың сәуір айында ұсталды. Ол синтетикалық есірткілердің партияларын қабылдап алып, алдын ала жоспарланған орындарға жасырып отырған. Тыйым салынған заттарды тасымалдау үшін өзі жұмыс істейтін кәсіпорынның автокөлігін пайдаланған, деп хабарлайды QZ Media тілшісі.

Ер адам 9 және 11 сәуір күндері «кураторларымен» жазыса отырып, α-PvP есірткісі салынған екі үлкен пакетті іздеп тапқан. СҚО ПД есірткі қылмысына қарсы іс-қимыл басқармасының қызметкерлері оны Петропавл қаласының шетінде орналасқан Мещан орманында ұстады. Ұсталған ер адамнан жалпы салмағы 22,91 грамм болатын психотроптық заттар салынған 51 түйіншек тәркіленіп алынды. Бұл аса ірі мөлшерге жатады.

“Тергеу барысында ұсталған ер адамның өткен жылдың желтоқсан айында есірткі таратумен айналыса бастағаны белгілі болды. Әдетте есірткі дилерінің жұмысы көпке созылмайды. Қазіргі уақытта қала тұрғыны қылмыстық жауапкершілікке тартылды, соттың үкіміне сәйкес 10 жыл 6 айға бас бостандығынан айыру түріндегі жазасын өтеп жатыр”, – дейді СҚО ПД ЕҚҚІҚБ бастығы полиция подполковнигі Руслан Сапаров.