Қозыбаев университетінің үшінші корпусы жұмысын тоқтатты

Қозыбаев университетінің үшінші корпусында қоңырау уақытша соғылмайды. Нысанның жарамсыз күйде болуына байланысты Тіл және әдебиет институтының педагогикалық құрамы және 700-ге жуық студент басқа оқу ғимараттарына көшірілді, деп хабарлайды QZ News тілшісі.

Университет ректоры бұл мәжбүрлі шара екенін айтты. Ол болашақ филологтар – орыс, қазақ және шет тілі мұғалімдері, сондай-ақ оқытушылар қауіпсіздік үшін басқа ғимаратқа орналастырылғанын мәлімдеді.

“Ғимараттың жағдайына қатысты сараптама екі жыл бұрын жүргізілген. Профильдік компанияның есебінде ғимараттың жекелеген құрылымдары, атап айтқанда іргетасы, төбелері қанағаттанарлықсыз күйде екендігі жазылған. Мән-жайды толық түсінгенге дейін біз оқытушылар мен студенттерді басқа ғимараттарға орналастыру жайлы шешім қабылдадық. Біз қосымша сараптама туралы мәселені пысықтап жатырмыз. Үшінші ғимарат-университеттің ең ескі ғимараттарының бірі, ол 1958 жылы қолданысқа берілген. Ғимарат ерекше, оның өзіндік архитектуралық стилі бар. Сараптамадан кейін біз нысанға қатысты не істейтінімізді шешеміз”, – деді
Қозыбаев университеті Басқарма Төрағасы-Ректоры Ербол Исақаев.

ЖОО ректоры оның қолында жобалық-сметалық құжаттама бар екенін де атап өтті. Онда ғимаратты жөндеу үшін 1 млрд теңге жұмсалуы мүмкін екеніні жазылған. Бұл – алдын ала ақпарат, деп атап өтті Ербол Исақаев.