Сқо-да 681 млн теңгеден астам цифрлық активтерді заңсыз айналымға шығарған үш азамат сотталды
Солтүстік Қазақстан облысы бойынша ҚМА департаменті цифрлық активтердің заңсыз айналымына қатысты қылмыстық істі тергеуді аяқтады, деп хабарлайды QZ News тілшісі.
ҚР ҚМА баспасөз қызметінің мәліметінше, облыста үш азамат тиісті лицензиясыз криптовалюта қабылдау және айырбастау операцияларын жүргізген. Олар криптовалюта биржаларынан алынған қаражатты пайдаланып, криптокошелек арқылы қамтамасыз етілмеген цифрлық активтермен айырбас операцияларын жүзеге асырған. Қазақстан Республикасының аумағында қызметі тыйым салынған криптобиржалар арқылы жасалған бұл операциялар заңсыз болды. Жалпы айналым сомасы 681 млн теңгеден астам.
«380 адам осы үш азаматпен криптовалюта бойынша транзакциялар жасағаны анықталды. Құны шамамен 400 млн теңгені құрайтын мүлік тәркіленді, оның ішінде 10 млн теңге көлемінде активтер, 150 млн теңге бағасындағы жылжымайтын мүлік, жалпы құны 213 млн теңге болатын бес көлік, 12 млн теңге тұратын квадроцикл және қымбат компьютерлік жабдықтар бар. Солтүстік Қазақстан облысы бойынша департаменті цифрлық активтерді заңсыз айналымға шығару фактісі бойынша қылмыстық істі тергеуді аяқтады. Сот үш күдіктіге қатысты шешім қабылдап, оларды 2,5 жылдан 3,5 жылға дейін бас бостандығынан айыру жазасына кесіп, мүліктерін тәркілеуге шешім қабылдады» деп жазылған хабарламада.
Заңсыз крипто биржалары күдікті транзакцияларды анықтамайды. Сондықтан олардың қызметтерін қылмыскерлер, ең алдымен кибералаяқтар мен есірткі саудагерлері жиі пайдаланады.