СҚО-да «Азаматтарды бірыңғай қабылдау күні» өтті

Оқушылар сарайында «Азаматтарды бірыңғай қабылдау күні» өтті. Білім беру нысанының кең залында азаматтардың сұрақтарына 33 мемлекеттік органның өкілдері жауап берді. Әдеттегідей, ең көп сұрақ аймақ басшысы мен қала басшысына қойылды. Олар қабылдау өткізген үстел маңында әрдайым адамдар тұрды, деп хабарлайды QZ News тілшісі.

Қабылдау аясында Солтүстік Қазақстан облысының әкіміне Есіл ауданындағы мүгедектер қоғамдық бірлестігінің төрағасы Виктор Кривошеев жүгінді.

“Есіл ауданының құрметті азаматы атануға лайықты бірнеше үміткерді ұсынамын. Олардың барлығы көрнекті адамдар, бірақ маған үнемі мақұлдамау жөнінде жауап келеді, бұл мәселе бойынша әкімдікке жүгіндім, маған көмектеспеді. Сізден осындай жағдайға назар аударуды сұраймын”, – деді Есіл ауданындағы мүгедектер қоғамдық бірлестігінің төрағасы Виктор Кривошеев.

Облыс әкімі Есіл ауданының басшысына телефон шалып, Виктор Кривошеев ұсынған кандидатуралар неліктен мақұлданбағанын білді. Тілдесу барысында Ғауез Нұрмұхамбетов Есіл ауданының әкімінен барлық қажетті құжаттарды көтеріп, қабылданған батыл шешімдердің дұрыстығына көз жеткізу үшін оларды қайта тексеруді сұрады.

“Ысмайылов пен Горький көшелерінде жолды кесіп өту мүмкін емес, онда үнемі апат болып тұрады, жақында аталған учаскеде бір адамды көлік қағып та кетті. Біз қала әкімдігіне хабарластық. Бағдаршам қарастырылмағандықтан ұсыныс қолдау таппайды, ал бұрын дәл сол жерде бағдаршам тұрды”, – деді Петропавл қаласының тұрғыны Әсем Айтжанова.

Бір ай ішінде бағдаршам орнатылады. Оған тиісті қаржы бөлінді. Бұл туралы өңір басшысына Петропавл қаласының әкімі Серік Мұхамедиев баяндады. Аймақ басшысына 22 өтініш беруші сұрақ қойды.«Азаматтарды бірыңғай қабылдау күні» Петропавлда ғана емес, өңір аудандарында да өтті.