СҚО-да полицейлер медициналық көмек қажет болған баланы ауруханаға жылдам жеткізді

27 ақпан күні кешке таман “Жезқазған – Петропавл” автожолының 950-шақырымында Toyota автокөлігінің жүргізушісі қайта-қайта көлік дабылын басып, полицейлерден көмек сұраған, деп хабарлайды QZ Media тілшісі.

Көлік салонында әйел мен шұғыл медициналық көмекке мұқтаж екі жасқа да толмаған бала отырған. Тәртіп сақшылары бала мен әйелді қызметтік көлікке отырғызып, жарқылдауық маяктарын қосып, Петропавл қаласындағы облыстық балалар ауруханасына жеткізген.

“Қазір ұлымыздың жағдайы жақсы. Жігіттерге өте ризамыз! Қызметтеріңіз тыныш болсын. Сіздерге және жақындарыңызға денсаулық тілейміз”, – деп баланың ата-анасы әлеуметтік желіде алғыс білдірді.

Облыстық патрульдік полиция батальонында 5 жылдай жұмыс істеп келе жатқан Арсен мен Игорь осындай жағдайға тап болған облысымыздың бірнеше азаматына көмектесті. Сақшылардың айтуынша, адамдардың алғыс сөздері қызметті жақсы атқаруға итермелейді.