СҚО-да Приходченко отбасының қатыгез өліміне қатысты сотталғандардың үкімі өзгертілді

2025 жылдың 27 наурызында Солтүстік Қазақстан облыстық сотының апелляциялық алқасы Приходченко ерлі-зайыптылары мен олардың кәмелетке толмаған ұлының өліміне қатысты қылмыстық істі сотталғандардың, жәбірленушінің апелляциялық шағымдары және прокурордың өтініші негізінде қарады, деп хабарлайды QZ News.

Апелляциялық соттың анықтауынша, 2023 жылдың 27 желтоқсанында Сергей Е. мен Данила О. алдын ала сөз байласып, Приходченко отбасының ірі көлемдегі мүлкін ұрлап, содан кейін отбасының үш мүшесін өлтірген.

Ирина С. бұл қылмыс туралы нақты білгеніне қарамастан, құқық қорғау органдарына хабарламаған.

«Өткен жылдың қазан айында Сергей Е. ерекше қауіпсіздік мекемесінде өмір бойы бас бостандығынан айыру жазасына кесілді; Данила О. орташа қауіпсіздік мекемесінде 21 жыл 8 айға бас бостандығынан айырылды;
Ирина С. орташа қауіпсіздік мекемесінде 3 жылға бас бостандығынан айырылды», – деп хабарлады облыстық сот.

Солтүстік Қазақстан облыстық сотының қылмыстық істер жөніндегі апелляциялық алқасы СҚО-ның мамандандырылған ауданаралық қылмыстық сотының үкімін өзгертті.

Нәтижесінде:

Сергей Е.-ге ерекше қауіпсіздік мекемесінде өмір бойы бас бостандығынан айыру жазасы түпкілікті тағайындалды.

Данила О.-ға орташа қауіпсіздік мекемесінде 23 жыл бас бостандығынан айыру жазасы белгіленді.

Ирина С.-ның жазасы 4 жылға дейін ұзартылды, ол орташа қауіпсіздік мекемесінде өтейді.

Сот қаулысы заңды күшіне енді.