СҚО Полиция департаменті жанынан нашақорлыққа қарсы кеңес құрылды

Петропавлда СҚО ПД бастығы, полиция генерал-майоры Айдын Қабдұлдиновтың ҮЕҰ және қоғам өкілдерімен өзара әрекеттесу және ынтымақтастық жөніндегі кеңес мүшелерімен кездесуі өтті. Жиында қаралған негізгі мәселе – жастар арасында нашақорлықтың алдын алу және синтетикалық әрі басқа да есірткінің зияны туралы ақпараттандыру, деп хабарлайды QZ News.

Синтетикалық есірткі соңғы жеті жылда Қазақстанда кең таралды. Егер 2018 жылы СҚО полицейлері 53 грамм «синтетиканы» тәркілеп, 34 есірткі қылмысын тіркесе, 2025 жылдың алғашқы тоқсанында 41 қылмыс анықталып, тәркіленген «дизайнерлік» есірткі көлемі 2 килограмнан асты.

Айдын Қабдұлдиновтің айтуынша, кездесудің басты мақсаты – нашақорлықтың алдын алу бойынша өзара әрекеттесу механизмін талқылау.

«Есірткі қылмысына қарсы күрес – мемлекеттік маңызы бар бағыттардың бірі, ол мемлекеттік органдар мен қоғамның бірлескен іс-шараларын талап етеді. Біз департамент жанынан есірткі құқықбұзушылықтың алдын алу кеңесін құруды ұсынамыз. ІІМ-де мұндай жұмыс органы құрылып, қызмет атқаруда. Оның басты мақсаты – қоғам өкілдері мен медиа тұлғаларды тарта отырып, кеңінен ақпараттандыру арқылы нашақорлық пен есірткі қылмысының алдын алу, сондай-ақ құқыққа бағынатын азамат пен салауатты өмір салтын насихаттау», – деді Қабдұлдинов.

Кездесу барысында Кеңестің құрамы бекітілді. Оған полицейлер, депутаттар, журналистер мен белгілі қоғам қайраткерлері кірді.

Жиында СҚО әкімі аппаратының басшысы Руслан Әлішев, сондай-ақ жаңа кеңес төрағасының орынбасарлары – СҚО ПД бастығының бірінші орынбасары Асқар Мұхаметқалиев пен Петропавл мәслихатының депутаты Закиржан Мамлютов сөз сөйледі. Қатысушылар кеңестің ережелерін бекітіп, өзара әрекеттесу мәселелерін талқылап, жақын уақыттағы жоспарларын белгіледі.