Қазақстанда дәрігерге кезек мәселесін қалай шешуге болады

Қазақстандықтар қажетті дәрігерге бірден жазыла алмайтын жағдайлар жиі кездеседі. Алайда қабылдауды күту мерзімі 15 жұмыс күнінен аспауы тиіс – егер бұл мерзімнен ұзақ болса, шағымдануға болады, деп хабарлайды QZ News NUR.KZ сайтына сілтеме жасап.

Кейде міндетті әлеуметтік медициналық сақтандыру (МӘМС) жүйесіне қатысушылар да медициналық қызметті бірден ала алмайды. Мұндай жағдайда пациенттер өз құқықтарын біліп, әділетсіздікке төзбеуі керек.

Қазақстанда заң бойынша медициналық қызметті күту мерзімі 15 жұмыс күнінен аспауы тиіс. Дәрігерлердің жүктемесінің жоғары болуы немесе орындардың болмауы медициналық ұйым үшін пациентті қабылдамауға негіз бола алмайды. Егер медициналық мекеме науқасты қабылдай алмаса, оны басқа дәрігерге немесе клиникаға жіберуі керек.

Егер азаматқа дәрігерге 15 күннен кейін ғана жазылуды ұсынса, қабылдаудан бас тартса немесе басқа маманға жібермесе, ол пациенттерді қолдау қызметіне жүгінуге құқылы.

Мұндай қызметтер әрбір мемлекеттік және жеке медициналық ұйым жанында жұмыс істейді. Олар пациенттердің құқықтарын қорғауға көмектеседі және көбінесе мәселені бірден шеше алады, қосымша құжаттарды толтыру немесе арыз жазу талап етілмейді.

Кейбір жағдайларда бейінді дәрігерге тікелей жазылуға болады:

• жедел жағдайлар мен жарақаттар;
• белгілі бір санаттағы пациенттердің стоматологиялық көмекке жүгінуі;
• дерматовенерологиялық ауруларға байланысты профильді маманға қаралу;
• тіркелген емханасында акушер-гинекологқа (жүктілік бойынша есепке қоюдан басқа) және психологқа жүгіну;
• онкологиялық және гематологиялық ауруларға күдік туындағанда профильді маманға қаралу;
• жастар денсаулық орталықтарына тікелей жүгіну;
• динамикалық бақылаудағы пациенттердің профильді дәрігерге қаралуы;
• бір жағдай аясында профильді маманның қайта қабылдауы және жаңа түзілімдерге күдік болған жағдайда;
• жылжымалы медициналық кешендер мен медициналық пойыздар арқылы қызмет алу.

Осылайша, қазақстандықтар медициналық мекемелердегі әділетсіздікке төзбей, өз құқықтары бұзылған жағдайда бірден әрекет етуі керек. Бұл МӘМС жүйесін барынша ашық әрі тиімді етуге көмектеседі.