Есіл ауданы тұрғынынан атыс қаруы мен оқ-дәрілер табылды

Есіл ауданының 44 жастағы тұрғынының үйінен полиция қызметкерлері атыс қаруы мен оқ-дәрілер тапты. Табылған заттар «Мал ұрлығы» және «Құқықтық тәртіп» жедел-алдын алу іс-шаралары барысында анықталды, деп хабарлайды QZ News.

Тексеру кезінде полицейлер үйден СКС ойық калибрлі карабинін, тіркелмеген ИЖ-К тегіс ұңғылы мылтығын және аңшылық патронға арналған қолдан жасалған қаруды тапты. Сондай-ақ, ер адамның үйінде ұсақ калибрлі винтовканың оқпаны мен затворы, тегіс ұңғылы мылтықтың оқпаны және түрлі калибрлі 700-ге жуық патрон сақталған.

Барлық табылған қарулар тәркіленіп, сараптама тағайындалды. Ойық ұңғылы қаруды сақтау фактісі бойынша қылмыстық іс қозғалды.

Ер адам мұндай аңшылыққа жарамды қарулар жинағын қайдан алғанын тергеу анықтайтын болады. Күдіктіге 5 мың АЕК-ке дейінгі ірі айыппұл немесе 5 жылға дейін бас бостандығынан айыру жазасы қарастырылған. Құқық қорғау органдары азаматтарға заңсыз сақталған қаруды өз еркімен тапсыру қылмыстық және әкімшілік жауапкершіліктен босататынын еске салады.