Халықтың және СҚО меценаттарының қаржысына Смирново ауылында жаңа мешіт салынады

Аққайың ауданының орталығы Смирново ауылында жаңа мешіт пайда болуы мүмкін. Қаражат жинау үшін “Аққайың – Асар” қоғамдық қоры құрылды, деп хабарлайды QZ Мedia тілшісі. Бұл туралы СҚО рестораторлар мен қонақүйлер қауымдастығының төрағасы Сайран Хамза әлеуметтік желі арқылы хабарлады. 

Жазбада Смирново ауылында мешіт салу мәселесі ұзақ уақыт – 20 жыл бойы талқыланғаны атап өтілді. Осыған орай аудан орталығының бастамашыл тобы “Аққайың – Асар” қоғамдық қорын құрды, соның арқасында жаңа ғимарат пайда болуы мүмкін. Қорды Сайран Хамза басқарады.

“Мен үшін бұл өте жауапты және маңызды жұмыс, өйткені, бұл – менің туған жерім. Смирново орталығында жер телімі бөлініп, екі деңгейдегі мешіттің көпшілікке ұнайтын жобасы анықталды. Алла жазса болашақта әдемі сәулеттік құрылыс біздің аудан орталығымызды көрікті ете түседі. Осы игі іске бар күш-жігерім мен білімімді жұмсаймын, сондай-ақ қор жұмысын ашық жүргіземін”, – деп жазды Сайран Хамза.

Әлеуметтік желілерде халықтың қайырымдылық ақшасы мен меценаттардың жарналары көрсетілетін арнайы сайт пен парақша құру жоспарлануда. Сондай-ақ, онда құрылыс шығындары мен құрылыс барысы жарияланып отырады. Сайран Хамза жазба барысында атап өткендей, Смирновода жұмыс істеп тұрған мешіт аудан орталығындағы ескі элеватор кеңсесінің ғимаратында орналасқан.