Kozybayev University Ташкентте өткен халықаралық жоғары оқу орындары көрмесіне қатысты

Өзбекстан астанасында Begin Edu Fair Group компаниясы ұйымдастырған беделді халықаралық университеттер көрмесі өтті. Қатысушылар арасында Еуропа, Солтүстік Америка және Оңтүстік-Шығыс Азияның жетекші жоғары оқу орындары болды. Қазақстан атынан Kozybayev University, KIMEP және KBTU қатысты, деп хабарлайды QZ News.

Университеттің баспасөз қызметінің мәліметінше, көрмеге шамамен 700 талапкер жиналды, олардың көпшілігі ата-аналарымен бірге келген.

«Біздің Аризона университетімен бірлескен қос дипломды бағдарламаларымыз үлкен қызығушылық тудырды: ондаған қатысушы өтінім қалдырып, қазақстандық және америкалық білім алуға ниет білдірді. Талапкерлер оқу ақысы, грант алу мүмкіндіктері, қаржылық қолдау және жатақханадағы тұрмыс жағдайлары туралы сұрақтар қойды. Этникалық қазақтар үшін университетке түсу талаптары мен академиялық мүмкіндіктер маңызды болды. Айта кетейік, біздің университетте Foundation дайындық факультеті жұмыс істейді, онда қандастар оқу курстарына қатысып, тілдік дағдыларын жетілдіріп, ҰБТ-ға дайындалып, университет өміріне бейімделе алады», – деп хабарлады Kozybayev University-дің баспасөз қызметі.