Наурыз мейрамы: Бескөл ауылында көктемнің басты мерекесі қалай атап өтілуде

Бескөлдіктер Наурыз мейрамын екі күн бойы тойлайды. Жергілікті тұрғындар үшін концерттік бағдарламалар, «Қош келдің, әз Наурыз» театрландырылған қойылымдары және спорттық шаралар ұйымдастырылды, деп хабарлайды QZ News.

Наурыз – жай ғана мейрам емес, бұл – жаңару мен қайта жаңғырудың символы. Көпшілік үшін бұл – жылдың ең сүйікті және көптен күткен мерекелерінің бірі. Сонымен қатар, Наурыз – достық пен өзара түсіністіктің маңыздылығын еске салатын, әртүрлі ұлттар мен мәдениеттерді біріктіретін мереке. Сондықтан оны тек қалада ғана емес, облыстың әр ауданында да кең ауқымда атап өтуге тырысады.

21 наурызда Бескөл ауылының «Оңтүстік-Шығыс» ауданында тұрғындарға арналған мазмұнды әрі қызықты бағдарлама ұйымдастырылды. Көпшілік алдында сөз сөйлеген аудан әкімі Сақтаған Сәдуақасов мереке қатысушыларына жылы лебізін білдірді. Ал нәзік жандыларға мерекелік гүл шоқтары табыс етілді.

Мерекеге жиналғандар үшін түрлі спорттық ойындар өткізілді. Кез келген адам өз күшін арқан тарту, гір көтеру, асық ату және қол күресі сайыстарында сынай алды.

Кішкентай қызылжарлықтар үшін де арнайы ойын-сауық бағдарламасы дайындалды – балаларға арналған ойындар ұйымдастырылып, батуттар орнатылды.

Мереке ұлттық тағамдарсыз өтпейді! Қонақтарға Наурыз көже, қымыз, палау, бауырсақ және әртүрлі тәттілер ұсынылды. Ал аудандық Мәдениет үйі мен №3 орта мектебінің ұжымы мерекелік концерт әзірледі.