Наурызнама мерекесі, ардагерді құттықтау және тұрғындармен кездесу: Ғауез Нұрмұхамбетов жұмыс сапарымен Тимирязев ауданына барды

Ғауез Нұрмұхамбетов Тимирязев ауданына барып, көктемгі су тасқынына дайындықты тексерді, аудандық аурухананың күрделі жөндеу жұмыстарының барысымен танысты. Сондай-ақ, ол Ақжан ауылындағы жаңа медициналық пунктке, “Атамекен Агро Тимирязево” ЖШС-нің мал шаруашылығы кешеніне және “Амиркин” жеке кәсіпкерінің сауда үйіне барды, деп хабарлайды QZ News.

Наурызнама аясындағы “Жаңару күні” мерекесін өңір басшысы Степное ауылының тұрғындарымен бірге атап өтті. Салтанатты іс-шара “Ауыл – Ел бесігі” бағдарламасы аясында салынған мәдени-сауықтыру орталығында өтті. Әкім ауыл тұрғындарын Наурыз мерекесімен құттықтап, бақыт пен амандық тіледі.

Ұлы Жеңістің 80 жылдығы аясында облыс әкімі тыл еңбеккері Екатерина Чмерукке қонаққа барды. Соғыс басталғанда ол небәрі 7 жаста еді және өзге балалармен бірге егістікте еңбек етті. Әкесі майданға аттанды, ал анасы екеуі қиын жылдарды бастан өткерді. Соғыстан кейін Екатерина Давыдовна құрылыс нысандарында жұмыс істеп, жұбайымен бірге үш бала тәрбиеледі. Биыл ол 90 жасқа толады. Ғауез Нұрмұхамбетов оны мерейтойымен құттықтап, өлшеусіз еңбегі мен еліміздің бейбіт болашағына қосқан үлесі үшін алғыс білдірді.

Сондай-ақ, өңір басшысы агротехникалық колледжге барып, Мемлекет басшысының бастамасымен жарияланған Жұмысшы мамандықтар жылы аясында кәсіби мамандарды даярлау барысымен танысты. Қазіргі таңда колледжде механизатор, аспаз және дәнекерлеуші мамандықтары бойынша 139 студент мемлекеттік тапсырыс аясында білім алуда. Алдағы уақытта оқу орнының контингентін ұлғайту және наубайшы-кондитер мамандығын енгізу жоспарлануда. Әкім еңбек жолын жұмысшы мамандықтарына арнаған ардагерлермен кездесті. Олар өз еңбегі мен адалдығы арқылы өскелең ұрпаққа үлгі болып отыр.

Сапардың соңында облыс әкімі Тимирязев ауданы тұрғындарымен кездесіп, атқарылған жұмыстардың нәтижесі мен өңірді дамыту жоспарларын талқылады. Биыл Москворецкое ауылына апаратын және елді мекен ішіндегі жолдарға күрделі жөндеу жүргізу, Дмитриевка ауылындағы көшелерге асфальт төсеу жоспарланған.

Сонымен қатар, Тимирязев орта мектебі-гимназиясы мен аудандық аурухананы күрделі жөндеуден өткізу, Мичурино ауылындағы тарату желілерін қайта құру, Тимирязево ауылында су тарату желілері мен су қоймаларын салу көзделуде. Аудандағы тоғыз ауылда су мұнаралары мен сорғы станцияларын салу жұмыстары аяқталады.