Пестрое көлі мен Тепличное ауылы маңында әмбебап құтқару кешені ашылды
Солтүстік Қазақстан облысында Төтенше жағдайлар министрі Шынғыс Әрінов пен СҚО әкімі Ғауез Нұрмұхамбетовтың қатысуымен алғашқы әмбебап авариялық-құтқару және іздестіру жұмыстарына арналған кешен ашылды. Жаңа нысан Пестрое көлі мен Тепличное ауылының жанында орналасқан, деп хабарлайды QZ News тілшісі.
Бұған дейін жедел-құтқару жасағының өз ғимараты болмаған. Жаңа кешен құтқарушылардың төтенше жағдайларға жедел әрекет етуіне мүмкіндік беретін маңызды қауіпсіздік нысаны болмақ. Кешен заманауи техника және жабдықтармен толық қамтамасыз етілген, бұл кез келген жағдайда тиімді жұмыс істеуге көмектеседі. Мысалы, кешенге көлік есіктерін ашуға арналған арнайы балға, металды кесуге және апат кезінде қысылған көліктерді ашуға арналған құралдар сатып алынды. Сондай-ақ, мұнда сүңгуірлер мен қайықтар бар, кинологтар иттерімен жұмыс істейді.
«Су тасқыны кезеңінде құтқару жасағы адамдарды құтқару бойынша маңызды міндет атқарады. Бұл кешен төтенше жағдайларға дайындық деңгейін едәуір арттырып, әрекет ету уақытын қысқартады және көмек көрсету сапасын жақсартады», — деді СҚО әкімі.
