Петропавлда «ProEco» байқауында солтүстікқазақстандық оқушылар 22 жоба ұсынды

Солтүстік Қазақстан облысында «Қызылжар дарыны» дарынды балалар мен талантты жастарды анықтау және қолдау орталығы 5-8 сынып оқушыларына арналған республикалық «ProEco» экологиялық жобалар байқауының облыстық кезеңін өткізді. Байқауға өңірдің білім беру ұйымдарынан 34 оқушы 22 жобамен қатысты, деп хабарлайды QZ News.

«Қызылжар дарыны» орталығы атап өткендей, байқаудың басты мақсаты – оқушылардың әлеуметтік жауапкершілігін қалыптастыру, экологиялық сауаттылығын арттыру, табиғатты қорғау мәдениетін дамыту және зияткерлік-шығармашылық әлеуетін ынталандыру.

Байқау төрт бағыт бойынша өтті:

1.⁠ ⁠«Туған жер табиғаты» – виртуалды экскурсиялар, табиғи нысандардың 3D-модельдері, өңірдің табиғи аймақтары мен экожүйелерінің бірегейлігін көрсететін интерактивті карталар (жеке жоба).

2.⁠ ⁠«Қоршаған әлем – таңғажайып әлем» – табиғат пен оның құбылыстары туралы бейнешолу, шағын деректі фильмдер, шығармашылық әңгімелер, фотосуреттерден құралған эссе (жеке жоба).

3.⁠ ⁠«Үздік экологиялық бастама» – экологиялық мәселелерді шешуге бағытталған жобалар, макеттер, экодизайн, аналитикалық зерттеулер, инфографикамен толықтырылған мәтіндік жобалар (командалық жоба, ең көбі 2 қатысушы).

4.⁠ ⁠«Таза қала – өзіңнен басталады» – экологиялық акциялар, көгалдандыру, абаттандыру, фотоесептер, бейнежобалар, қала ортасын жақсартуға арналған аналитикалық материалдар (жеке жоба).

«Әр бағыт бойынша жеңімпаздар 28-30 сәуір аралығында Астана қаласында өтетін республикалық кезеңде Солтүстік Қазақстан облысының намысын қорғайды», – деп атап өтті «Қызылжар дарыны» орталығы.