Петропавлдың НЗМ халықаралық ынтымақтастығы кеңеюде: CUHK-Shenzhen университетімен меморандумға қол қойылды

NIS Басқарма төрағасының орынбасары Сабыржан Садуакасов пен CUHK-Shenzhen академиялық байланыстар офисінің директоры Пол Ке ынтымақтастық туралы меморандумға қол қойды, деп хабарлайды QZ News.

Салтанатты рәсім бакалавриатқа үміткерлерге арналған халықаралық ашық есік күні аясында өтті. NIS өкілдері CUHK-Shenzhen университетінің академиялық бағдарламаларымен, студенттерді қолдау жүйесімен, халықаралық алмасу бағдарламаларымен және түлектердің мансаптық мүмкіндіктерімен танысты.

Кездесу барысында білім берудің болашағы, цифрландыру және жасанды интеллекттің дамуы жөніндегі мәселелер талқыланды. Сондай-ақ, CUHK-Shenzhen университетінде оқып жүрген NIS түлектері өз тәжірибелерімен бөлісті.

NIS баспасөз қызметінің мәліметінше, бұл ынтымақтастық Интеллектуалды мектептердің оқушыларына жаңа білім беру мүмкіндіктерін ашады. Атап айтқанда, заманауи оқыту әдістеріне қолжетімділік, академиялық мобильділік және халықаралық алмасу бағдарламалары, сондай-ақ Азияның жетекші университеттеріндегі зерттеу бастамалары қарастырылған.

«Келісім аясында CUHK-Shenzhen университеті NIS түлектеріне бакалавриат бағдарламалары бойынша екі толық грант бөлді. Олар «Бизнес-әкімшілендіру (қаржылық инженерия)», «Аударма ісі (қытай-ағылшын)» және Музыка мектебінің мамандықтарынан басқа барлық бағыттарға қолжетімді», – деп хабарлады баспасөз қызметі.

Сабыржан Садуакасовтың айтуынша, CUHK-Shenzhen университетімен ынтымақтастық NIS-тің халықаралық деңгейдегі беделін арттырып, оқушыларға әлемнің үздік университеттерінің біріне түсуге бірегей мүмкіндік береді.