Петропавлдың НЗМ оқушылары жасанды интеллект бойынша алғашқы желілік олимпиаданың жүлдегерлері атанды

Астана қаласындағы Назарбаев Зияткерлік мектебінде 10–12-сынып оқушылары арасында жасанды интеллект бойынша алғашқы желілік олимпиада өтті. Барлық NIS мектептерінен 150-ден астам оқушы қатысқан бұл байқауда Петропавлдың НЗМ намысын 11-сынып оқушылары Нұрбатыр Төлеген, Арсен Ғалымжан және Тимур Иманов қорғады, деп хабарлайды QZ News.

Екі күн бойы қатысушылар күрделі есептерді шешіп, жасанды интеллект саласындағы білімдері мен дағдыларын көрсетті.

«Өткен жылы біз алғаш рет Хакатон ұйымдастырып, оқушыларымыздың қаншалықты дарынды және креативті екенін байқадық. Бұл іс-шара идея алмасу, күрделі мәселелерді шешу және инновациялық шешімдерді іздеу алаңына айналды. Бүгінгі олимпиада – осы бағыттағы тағы бір ілгерілеу қадамы, ол барлық қатысушылар үшін жаңа мүмкіндіктер ашады», – деді «Назарбаев Зияткерлік мектептері» ДББҰ Басқарма төрағасы Ануар Жанғозин.

Олимпиада аясында қатысушылар Назарбаев Университетінің ISSAI институты, Astana IT University және халықаралық жоғары оқу орындарының сарапшылары өткізген дәрістерге қатысты.

Жабылу салтанатында жеңімпаздар мен жүлдегерлерге еліміздің жетекші университеттері мен білім беру платформалары – Назарбаев Университеті, Қазақстан-Британ Техникалық университеті, Astana IT University және AI-Academy ұсынған жасанды интеллект бойынша қысқамерзімді курстарға білім гранттары табысталды.

Олимпиада қорытындысы бойынша Нұрбатыр Төлеген бас жүлдені иеленсе, Арсен Ғалымжан мен Тимур Иманов үшінші орынға ие болды.