СҚО-да құрғақ шөптің жануынан 19 өрт тіркелді

Солтүстік Қазақстан облысында өрт қаупі жоғары маусымға дайындық жүргізілуде. СҚО Төтенше жағдайлар департаментінің мәліметінше, ол 14 сәуірде басталады, деп хабарлайды QZ News.

Алайда, қардың ерте еруі мен жылы ауа райына байланысты облыс аумағында құрғақ шөптің жану оқиғалары жиілеп кетті.

«25 наурыздан бері облыста құрғақ өсімдіктердің жануы бойынша 19 жағдай тіркелді, жалпы жанған аумақ шамамен 30 гектарды құрады (Тайынша ауданы – 14 жағдай, Петропавл қаласы – 2 жағдай, Айыртау, М. Жұмабаев және Жамбыл аудандарында бір-бір жағдайдан). Негізгі себеп – тұрғындардың отқа ұқыпсыз қарауы. Өткен жылдың осы кезеңінде облыста құрғақ шөптің жануы тіркелмеген. Алғашқы оқиға 2024 жылдың 18 сәуірінде болған еді», – деді СҚО ТЖД мемлекеттік өрт бақылау басқармасының басшысы Аслан Ахметжанов брифингте.