СҚО-да су тасқыны жағдайын Вице-Премьер Канат Бозымбаев тексерді

Қазақстан Республикасы Премьер-Министрінің орынбасары Канат Бозымбаев жұмыс сапары барысында Солтүстік Қазақстан облысындағы су тасқыны жағдайымен танысып, тасқынға қарсы шаралардың орындалуын тексерді, деп хабарлайды QZ News.

Вице-премьер Есіл өзені бойындағы ауылдарды, Сергеев су торабының жағдайын, Қызылжар ауданының Прибрежное ауылындағы, Петропавлдағы Ущев және Биопруд бөгеттеріндегі нығайту жұмыстарын тексерді. Сондай-ақ, Заречныйдағы бау-бақша серіктестіктерін және айналма арнаны аралады.

Өңірде су тасқынына дайындық бойынша кешенді жұмыстар жүргізілуде. Петропавл мен Қызылжар ауданында 8 қорғаныс бөгеті нығайтылды. Дамбалар бетон плиталармен және полипропиленді жабындармен күшейтіліп, елді мекендерді қорғауға мүмкіндік береді.

«Қазір Сергеев гидроторабында су тасқынының екінші толқыны байқалуда. Петропавлда алғашқы толқынның шарықтау шегі 5-6 сәуірде күтіледі. Бау-бақша серіктестіктерінің тұрғындары эвакуацияланды. Айналма жолда су тасқыны тіркеліп, тәулік бойы кезекшілік ұйымдастырылды. Қазіргі басты назар – Заречный ауылы. Жағдай бақылауда», – деп жазды өңір басшысы Ғауез Нұрмұхамбетов әлеуметтік желілерде.