СҚО-дағы ҚАЖ мекемесінің басшысы сотқа пікір беру мерзімін бұзғаны үшін айыппұл төлейді

Солтүстік Қазақстан облысының мамандандырылған ауданаралық әкімшілік соты ҚР ІІМ Қылмыстық-атқару жүйесі комитетінің «№66 мекеме» РММ басшысын әкімшілік жауапкершілікке тартып, оған 10 айлық есептік көрсеткіш (39 320 теңге) мөлшерінде айыппұл салды, деп хабарлайды QZ News.

Айыппұл салуға мекеме тарапынан сотқа талап арыз бойынша жазбаша пікірді кешіктіріп ұсыну негіз болды. Соттың ұйғарымы бойынша, №66 мекеме бұл пікірді СҚО ҚАЖ департаменті басшысының негізделген ұстанымымен бірге 2025 жылдың 10 сәуіріне дейін ұсынуы тиіс еді. Алайда, сот отырысында анықталғандай, қажетті құжат тек 2025 жылғы 17 сәуірде ғана жолданған.

Сотта №66 мекеме басшысы сот ұйғарымының уақтылы орындалуына тиісінше бақылау жасалмағанын мойындады.

Сот Әкімшілік рәсімдік-процестік кодекстің 127-бабына сүйене отырып, бұл жағдайды сотқа құрметсіздік танытатын әрекет ретінде бағалады. Сонымен қатар, сот ҚР «Ішкі істер органдары туралы» заңының 6-бабы 1-тармағының 25) тармақшасын еске салды, онда ішкі істер органдарына сот актілерін және судьялардың талаптарын өз құзыреті шегінде орындау міндеті жүктелген. Сот ҚАЖ мекемесі басшылығы тарапынан сот актілерінің орындалуына бақылаудың болмауын жол беруге болмайтын жағдай деп атап өтті.

Айыппұл салу – сот процесіне қатысушыларды өз іс жүргізу міндеттерін адал орындауға ынталандыруға бағытталған шара.

Айта кету керек, бұл сот ұйғарымы әлі заңды күшіне енген жоқ.