СҚО-ның Ақжар ауданында бидай тиелген тіркеме аударылып қалды

СҚО ПД патрульдік полиция батальонының қызметкерлері Ақжар ауданында жолдағы жағдайды бақылау кезінде «Көкшетау-Омбы» автожолының 151 шақырымында «Shacman» ауыр жүк көлігін байқап қалыпты. Бұл көліктен ақау шығып, тіркемесі аударылған, деп хабарлайды QZ News тілшісі.

Жүргізуші зардап шекпеді, бірақ Талшық ауылына апара жатқан бидай жол үстіне шашылды.

“Көлік қозғалысы көп бұл учаскеде әр бағытта бір жолақтан ғана бар. Қаладан манипулятор шақырылды, полицейлер сол маңдағы шаруашылықтардың бірінен жүк тиегішті табуға көмектесті. Бірнеше сағат бойы тәртіп сақшылары оқиға орнында болып, жол қауіпсіздігін қамтамасыз етті”,- делінген СҚО ПД баспасөз қызметінің хабарламасында.