СҚО студенттері атом энергетикасы саласында жұмысқа орналасу және практикадан өту мүмкіндіктеріне қызығушылық танытып отыр

Өңірлік халықтық штаб мүшелері АЭС құрылысы бойынша Мағжан Жұмабаев атындағы жоғары колледж студенттерімен кездесу өткізді. Іс-шара Қазақстандағы атом энергетикасын дамытудың өзекті мәселелерін, сондай-ақ болашақ АЭС құрылысына байланысты мүмкіндіктер мен сын-қатерлерді талқылауға бағытталған, деп хабарлайды QZ News тілшісі.
⠀
Штаб өкілдері Мұқарам Тайжанова, Лаура Қайыржанова және Фариза Мұқанова студенттерге елдің тұрақты дамуы үшін атом энергетикасының маңыздылығы, оның энергетикалық қауіпсіздікті қамтамасыз етудегі және көміртегі үлесін төмендетудегі рөлі туралы айтып берді. АЭС құрылысы Қазақстанның энергетикалық көздерін әртараптандыру және қазба отынға тәуелділікті төмендету жолындағы маңызды қадам болуы мүмкін екендігі атап өтілді.

“Бұл мәселеде қауіпсіздік пен экологияға ерекше көңіл бөлінеді, осы жайт біздің әрбір кездесуімізде пікірталас тудырады. Әрине, қауіп-қатерлерді азайту үшін ерекше шаралар қолданылады, өйткені болашақ станцияда қауіпсіздіктің ерекше стандарттары болады”, – деп атап өтті штаб өкілі Мұқарам Тайжанова. 

Студенттер АЭС-тің қоршаған ортаға әсері, атом энергетикасында жұмысқа орналасу перспективалары және осындай нысандарда тәжірибеден өту мүмкіндіктері туралы сұрақтар қойып, тақырыпқа қызығушылық танытты. Халықтық штаб мүшелері кездесуге қатысушыларды Қазақстан станцияны салу және пайдалану кезінде халықаралық стандарттарды ұстанатынын баса айтты.