Су тасқыны – 2025: Петропавлда гуманитарлық көмек мәселелері бойынша жедел штаб отырысы өтті

Петропавлда Солтүстік Қазақстан облысының кәсіпкерлік және индустриялық-инновациялық даму басқармасының алаңында жедел штабтың отырысы өтті. Кездесуде көктемгі су тасқыны кезеңі күрделенген жағдайда гуманитарлық көмекті бөлуге арналған алаңның, жауапты мемлекеттік органдар мен волонтерлік ұйымдардың дайындығы талқыланды, деп хабарлайды QZ News.

Отырыста кәсіпкерлік және индустриялық-инновациялық даму басқармасының басшылығы, Петропавл қаласы әкімінің орынбасары Қалия Түренова, ішкі саясат басқармасының басшылығы, «Аманат» партиясы, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия мүшесі Елена Семидоцких, сондай-ақ «Радуга» ЖШС басшылығы қатысты.

«Кездесу қорытындысы бойынша гуманитарлық көмекті бөлу жоспары жасалып, оны қабылдау және тарату алаңы ретінде «Радуга» ЖШС базасы белгіленді. Сонымен қатар, комиссия мүшелерінің тізімі жаңартылып, гуманитарлық көмекті бөлшек тарату орындары мен олардың саны анықталды», – деп хабарлады кәсіпкерлік және индустриялық-инновациялық даму басқармасы.

Барлық қажетті жұмыстар жауапты мемлекеттік органдармен үйлестіре отырып жүргізілетін болады.