Петропавл әкімі қоғамдық мүлікке ұқыпты қараудың маңыздылығын еске салды
Қала әкімі Серік Мұхамедиев облыс орталығы тұрғындарына қоғамдық мүлікке ұқыпты қарау қажеттігін еске салды. Әсіресе, жылы аялдама павильондарына ерекше назар аударылды, деп хабарлайды QZ News.
Өткен жылдың соңында қаладағы бірнеше шағын ауданда ескі шыны аялдамалардың орнына 20 жылы аялдама орнатылды. Қала басшысына олардың электр қуатына қосылуына қатысты сұрақтар бірнеше рет қойылған.
«Қажетті құжаттарды рәсімдеудің ұзаққа созылуына байланысты қосу процесі кешіктірілді. Алайда қазіргі уақытта техникалық шарттар алынып, тиісті жұмыстар басталды. Сондай-ақ, қоғамдық мүлікке ұқыпты қараудың маңыздылығын тағы да еске салғым келеді. Қаламыздың тазалығы мен тәртібі әрқайсымызға байланысты, сондықтан сіздердің қолдауларыңыз бен түсіністіктеріңізге үміттенеміз. Биыл бұл жұмыстарды жалғастырамыз», – деді қала әкімі тұрғындармен кездесуде.