Петропавлда квазимемлекеттік секторда сыбайлас жемқорлықтың алдын алу бойынша оқыту жүргізілуде
Петропавл қаласында квазимемлекеттік сектор мамандарына арналған «Сыбайлас жемқорлыққа қарсы комплаенс мектебі» атты оқыту семинары өтті. Іс-шараның басты мақсаты – сыбайлас жемқорлықтың алдын алуға бағытталған шараларды күшейту және тәуекелдерді басқару мен бақылауға жүйелі тәсілді енгізу, деп хабарлайды QZ News.
Сыбайлас жемқорлыққа қарсы іс-қимыл агенттігінің Солтүстік Қазақстан облысы бойынша департаменті басшысының бірінші орынбасары Алмат Мирзалиев әділ қоғам құру жағдайында заңдылық пен ашықтық басымдыққа ие болып отырғанын атап өтіп, комплаенстің бұл мақсаттарға жетудегі маңызды құралға айналғанын айтты.
Бүгінгі таңда өңірде сыбайлас жемқорлыққа қарсы комплаенс институты белсенді түрде енгізілуде. Оның өкілдері ұйымдардың қызметі тек нормативтік талаптарға ғана емес, сонымен қатар жоғары моральдық стандарттарға сәйкес болуын бақылап отырады.
Семинар барысында сарапшылар мен қатысушылар корпоративтік секторда сыбайлас жемқорлыққа қарсы іс-қимылдың заманауи әдістері мен практикалық тәжірибелерімен белсенді бөлісті. Атап айтқанда, сыбайлас жемқорлыққа қарсы шараларды енгізуде тиімді құрал ретінде танылған ISO 37001 халықаралық стандартына ерекше назар аударылды.
