Петропавлда оқушылар құтқарушылардың жұмысымен танысты
Петропавл қаласында Төтенше жағдайлар департаментінің қызметкерлері мектеп оқушыларына құтқарушылардың шынайы жұмыс жағдайына барынша жақын, мазмұнды көрме ұйымдастырды. Шара Балаларды қорғау күні қарсаңында өтті, деп хабарлайды QZ News.
Балалар өрт сөндірушілердің күнделікті өмірімен танысып, өздерін біраз уақытқа нағыз өрт сөндіруші ретінде сезіну мүмкіндігіне ие болды. Олар арнайы техниканы қызығушылықпен қарап, жауынгерлік киімді киіп көріп, жабдықтармен танысты. Кейбір балалар тіпті өрт сөндіру көлігінің рөліне отырып көрді. Ерекше қызығушылық тудырған – тыныс алу аппараттары, арнайы қолғаптар мен «Трэкол» жол талғамайтын көлігі болды. Көрмеге келген балаларға төрт аяқтылар – құтқарушы иттер де қуаныш сыйлады. Кішкентай қонақтар олармен бірге суретке түсті. Көрме орталық алаңда өтіп, заманауи техникамен жабдықталған көліктердің көрмесін қамтыды.
«Орталық алаңда ғана емес, облыс орталығындағы және аудандық бөлімшелерде де шеберлік сағаттары мен ашық есік күндерін өткізіп жатырмыз. Балаларға техникаларымызды, құрал-жабдықтарымызды көрсетіп, құтқарушылардың қандай жағдайда жұмыс істейтінін таныстырамыз. Бұдан бөлек балалармен бірге ағаш отырғызу жұмыстарын да жоспарлап отырмыз. Мұндай кездесулер балалардың біздің қызметпен жақынырақ танысуына және болашақта құтқарушы мамандығын таңдауға сеп болуы мүмкін», – деді СҚО ТЖД басшысының орынбасары Мұрат Қанғожинов.
Өрт сөндірушілермен қатар көрмеге СҚО бойынша Апаттар медицинасы орталығының – шұғыл медициналық көмекті ұйымдастыру бөлімінің мамандары да қатысты. Олар балаларға алғашқы көмек көрсету негіздерін түсіндіріп, шұғыл жағдайларда қолданылатын жабдықтарды көрсетті.
«Біз жүрек-өкпе реанимациясының негізгі әдістерін көрсетіп, дәрігерлер келгенге дейін не істеу керектігін түсіндірдік. Балалар мұқият тыңдап қана қоймай, манекенде әрекеттерді өздері де орындап көрді. Медициналық жабдық ерекше қызығушылық тудырды. Бүгін көрсетілген құрал-жабдықтардың барлығы заманауи және күнделікті жедел шақыртуларда қолданылады», – деді шұғыл медициналық көмекті ұйымдастыру бөлімінің фельдшері Элина Келлер.
Көрме қонақтарының бірі – Дарья Попова есімді оқушы болды. Ол алғашқы минуттардан-ақ үлкен қызығушылықпен барлығын бақылап, құтқарушыларға сұрақтар қойып, барлық интерактивті аймақтарға белсенді қатысты.
«Мен ешқашан өрт сөндіру көлігін дәл осылай жақыннан көрмеппін. Маған рөлге отыруға, шланг ұстауға, нағыз киімді киіп көруге рұқсат берді. Ол ойлағанымнан әлдеқайда ауыр болып шықты! Сонымен қатар тыныс алу аппаратын да қолданып көрдім – бұл өте ерекше әрі қызықты болды», – деп әсерімен бөлісті №24 орта мектептің 3-сынып оқушысы Дарья Попова.
Төтенше жағдайлар департаменті осындай көрмелерді жазғы демалыс бойы өткізіп, оқушылардың уақытын тек көңілді ғана емес, пайдалы да етуге ниетті.