СҚО-да кәмелетке толмағандардың ар-намысына нұқсан келтіретін «PANIC PETRO» Telegram-арнасы бұғатталды

Әлеуметтік желілерге жүргізілген мониторинг барысында облыстық прокуратура экстремистік және террористік сипаттағы ақпарат, жасөспірімдердің өз-өзіне қол жұмсауын насихаттау және балаларға қатысты зорлық-зомбылықты насихаттайтын топтарды анықтады, деп хабарлайды QZ News.

Telegram-дағы «PANIC PETRO» арнасында кәмелетке толмағандардың ар-намысына нұқсан келтіретін жазбалар мен сексуалдық сипаттағы бейнероликтер жарияланған.

«Қабылданған шаралар аясында «Кибернадзор» ақпараттық жүйесі арқылы бұл топтарға қолжетімділік бұғатталды. Жалпы, жыл басынан бері облыстық прокуратура заңға қайшы контенті бар 81 топты бұғаттады», – делінген СҚО прокуратурасының хабарламасында.

Айта кетейік, бұл – кәмелетке толмағандардың ар-намысына нұқсан келтіретін контент жарияланған алғашқы Telegram-арна емес. Биыл ақпан айында да облыс орталығындағы мектеп оқушылары туралы әдепсіз ақпараттар таратылған арна анықталған болатын.