СҚО-да жыл басынан бері өрттен 12 адам қаза тапты

Петропавлда СҚО Төтенше жағдайлар департаментінің өкілдері өңірдегі өрт жағдайы туралы баяндады. 2025 жылдың басынан бері облыс аумағында 122 өрт тіркелді. Өрт салдарынан 12 адам, оның ішінде 3 бала қаза тапты, 15 адам жарақат алды. Көміртегі тотығымен уланудан 1 адам көз жұмып, 9 адам зардап шекті, деп хабарлайды QZ News.

2024 жылдың 1 қазанынан басталған жылыту маусымынан бері облыста 209 өрт тіркеліп, олардың материалдық шығыны 45 млн 755 мың теңгені құрады. Бұл өрттерде 22 адам, оның ішінде 4 бала қаза тауып, 20 адам жарақат алды.

«Облыс бойынша әлеуметтік тұрғыдан осал топтарға жататын 4 483 тұрғын үй есепке алынды, онда 11 392 адам, оның ішінде 4 411 бала тұрады. Өрт қауіпсіздігі айлығы аясында осы үйлердің барлығында профилактикалық жұмыстар жүргізілді. Әлеуметтік осал топтар тұратын мекенжайларда өрт қауіпсіздігін арттыру мақсатында өрт хабарлағыштарын орнату жұмыстары жүргізілуде. Қазіргі таңда 4 010 үйге улы газ және түтін датчиктері орнатылды. Қосымша тағы 373 датчик қажет. Сонымен қатар, пешпен жылытылатын үйлерде тұратын 2 064 көпбалалы отбасы есепке алынды, оның ішінде 794 отбасы әлеуметтік осал топтар санатына кіреді. 1 381 үйге датчиктер орнатылды, тағы 702 үйге орнату қажет», – деді брифингте СҚО ТЖД мемлекеттік өрт бақылау басқармасының басшысы Аслан Ахметжанов.