СҚО-ның бес ауданында қалдықтарды шығаруға тарифтер негізсіз көтерілген

Солтүстік Қазақстан облысының прокуратурасы экологиялық заңнаманың өрескел бұзылуын анықтады. Облыстың кейбір аудандарында тұрғындар үшін қатты тұрмыстық қалдықтарды жинау, тасымалдау және көму тарифтері негізсіз өсірілген, деп хабарлайды QZ News.

М.Жұмабаев, Мамлют, Есіл, Тайынша және Тимирязев аудандарының лауазымды тұлғалары Экологиялық кодекс талаптарын бұзып, тарифтерді есептеу кезінде қалдықтарды сұрыптау шығындарын заңсыз енгізген.

«Мысалы, М.Жұмабаев ауданындағы коммуналдық кәсіпорын көпқабатты үйлердің тұрғындарынан қатты тұрмыстық қалдықтарды шығару үшін 319 теңге көлемінде төлем алып отырған, оның 51 теңгесі қоқысты сұрыптау үшін негізсіз есептелген. Арнайы табиғат қорғау прокурорының актісі негізінде кінәлі лауазымды тұлғалар тәртіптік жауапкершілікке тартылды, ал мәслихаттардың шешімімен тарифтерге тиісті өзгерістер енгізілді», – деп мәлімдеді облыстық прокуратура.

Нәтижесінде Мамлют, Есіл, Тайынша, Тимирязев және М.Жұмабаев аудандарында тарифтер орта есеппен 31 теңгеге төмендетілді.

Қабылданған қадағалау шараларының арқасында көпқабатты үйлерде тұратын 5 мыңнан астам азаматтың құқықтары қорғалды, артық төленген қаражат кейінгі төлемдер есебінен өтелетін болады.