Бескөлдегі көшелердің қайталануы логистика мен жергілікті бизнеске кедергі келтіруде
Солтүстік Қазақстан облысы Қызылжар ауданының Бескөл ауылындағы ретсіз көше-мекенжай жүйесі жергілікті кәсіпкерлер мен логистикалық қызметтердің жұмысына елеулі кедергі келтіріп отыр, деп хабарлайды QZ NEWS тілшісі.
Топонимикалық мәселелерді ретке келтіру мәселесі Солтүстік Қазақстан облысы Кәсіпкерлер палатасының Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесінің кезекті отырысында көтерілді.
Бескөлдегі логистикалық мәселелердің өзегіне айналған көшелердің бірі – Луговая көшесі. Анықталғандай, бір шағын ауданда осы атаумен шамамен 12 бөлек көше, тұйық көше және өткел бар. Жағдайды ғимараттардың ретсіз нөмірленуі де күрделендіріп отыр. Үйлерді жұп және тақ нөмірлерге бөлу қағидасы сақталмайды. Жаңа нөмірлер үйлердің пайдалануға берілу ретіне қарай берілетіндіктен, №3 үйдің қасында №30 үй орналасуы мүмкін, ал №4 үй ауылдың басқа шетінде тұруы ықтимал.
Салдарынан Google Maps пен 2GIS сияқты танымал навигациялық сервистердің өзі нақты бағытты дұрыс көрсете алмайды.
СҚО Кәсіпкерлер палатасы Қызылжар аудандық филиалының директоры Асқар Нұрмұқанов мәселенің ауқымына тоқталды.
«Біздің есептеуімізше, бір шағын ауданда шамамен 12 көше, тұйық көше және өткел бар. Олардың барлығы Луговая деп аталады. Осыған байланысты қиындық тек такси жүргізушілерінде ғана емес, көмір, отын, құрылыс материалдары және басқа да тауарларды жеткізумен айналысатын кәсіпорындарда да туындайды», – деді ол.
Мұндай белгісіздік кәсіпкерлерге айтарлықтай шығын әкелуде. Тауар жеткізу кестесі жиі бұзылады, жанар-жағармай шығыны артады, курьерлер мекенжайды қайта іздеп, уақыт жоғалтады. Ал тез бұзылатын өнімдердің жарамсыз болып қалу қаупі бар.
Бұл ретте түсінікті әрі бірыңғай мекенжай жүйесін қалыптастыру – мемлекеттік органдардың тікелей міндеті. Бескөл ауылдық округінің әкімдігі мәселенің бар екенін біледі. Алайда оны шешу үшін ауылдың кезекші жоспарына және «Мекенжай тіркелімі» жүйесіндегі деректерді жаңартуға жауапты аудандық сәулет, құрылыс және тұрғын үй-коммуналдық шаруашылық бөлімімен бірлескен жұмыс қажет.
Айта кетейік, мұндай топонимикалық ретсіздік Бескөлге ғана тән емес, еліміздің басқа өңірлерінде де кездеседі. Бұған дейін Қазақстан Президенті Қасым-Жомарт Тоқаев Ұлттық құрылтайда қайталанатын топонимдер мен атаусыз көшелер мәселесін ретке келтіруге шақырған болатын. Өйткені бұл жедел жәрдем, өрт сөндіру қызметі мен полиция жұмысына кедергі келтіреді.
Отырыс қорытындысы бойынша Кеңес жергілікті атқарушы органдарға Луговая көшесіне толық түгендеу жүргізуді, әрбір өткелге бірегей атау беруді, үйлердің нөмірленуін жүйелеуді және барлық мемлекеттік кадастрлар мен тізілімдердегі деректерді өзара сәйкестендіруді ұсынды.
Бұл географиялық қайталануларды жойып, кәсіпкерлердің артық шығынға ұшырауының алдын алуға мүмкіндік береді.