Петропавлда өткен қазақ тілі мен әдебиеті мұғалімдерінің республикалық форумына жүзден астам адам қатысты

Оқушылар сарайында қазақ тілі мен әдебиеті мұғалімдерінің республикалық форумы өтті. Іс-шараны “Қазақ тілі” халықаралық қоғамының мүшелері және Қазақстан Республикасы Оқу-ағарту министрлігінің сарапшылары ұйымдастырды. Бастаманы жергілікті атқарушы органдардың өкілдері қолдады, деп хабарлайды QZ Мedia тілшісі.

“Форумның негізгі мақсаты – біздің өңірде мемлекеттік тілді дамыту. Бұл – СҚО-дағы ең өзекті мәселелердің бірі. Сондықтан, біз жас ұрпақтан аға буынға дейін түсіндіру жұмыстарын жүргізіп жатырмыз”, – деді “Қазақ тілі” халықаралық қоғамы” ҚБ СҚОФ төрағасы Жанат Мұхамеджанов.

Кездесуге 150-ге жуық жергілікті оқытушы, сондай-ақ әртүрлі салада еңбек етіп жүрген филология ғылымдарының докторлары қатысты. Олар оқушылардың қазақ тілінде оқу сауаттылығы мен академиялық жазу мәдениетін дамыту туралы әңгімелеп, оқытушылардың кәсіби шеберлігін арттыру мәселелерін талқылады.

“Соңғы 5 жылда қазақ тілін дамыту бойынша үлкен жұмыс жүргіздік. Егер осы қарқынмен жұмыс істесек, онда біз бұдан да көп жетістікке жетеміз. Өкінішке қарай, әлі кеуде қаға алмаймыз”, – деді Шал ақын ауданындағы Қазақ тілі қоғамының төрағасы Анаргүл Қожахмет.