Теориядан тәжірибеге: Петропавлда оқушылар мен студенттер цифрлық болашақты қалай қалыптастырып жатыр
Петропавл қаласындағы Qyzyljar Creative Center және С.Мұқанов атындағы кітапхана базасындағы Maker Space пен SKO Hub алаңдарында оқушылар мен студенттерге арналған тағылымдамалық бағдарламалар сәтті жүзеге асырылып жатыр. Бұл бағдарламаларға заманауи цифрлық және креативті дағдыларды дамытуға қызығушылық танытқан 100-ден астам жас қатысуда, деп хабарлайды QZ News SKO Hub-қа сілтеме жасап.
Бағдарламалар тәжірибе мен бастамашылдыққа, көшбасшылық қасиеттерді дамытуға бағытталған. Осы арқылы өңірде жаңа буын технологиялық және қоғамдық көшбасшылар қалыптасуда. Тағылымгерлер бірнеше негізгі бағыт бойынша жұмысқа тартылған:
- Бағдарламалау және IT-жобалар – базалық қағидаларды меңгеруден бастап, өз цифрлық шешімдерін жасауға дейін;
- Медиаконтент және коммуникация – фото және бейнематериалдар әзірлеу, мәтін жазу, әлеуметтік желі жүргізу;
- Іс-шара ұйымдастыру – түрлі деңгейдегі іс-шараларды жоспарлау және жүзеге асыру;
- Клубтық жұмыс және волонтерлік – тақырыптық қауымдастықтар құру және әлеуметтік жобаларға қатысу.
С.Мұқанов атындағы кітапханада орналасқан Makerspace еріктілігі жастарға практикалық тәжірибе, топпен жұмыс істеу мен көшбасшылық дағдылар, оқыту бағдарламаларына қатысу, жабық мастер-класстар мен АҚШ-қа білім беру бағдарламалары арқылы баруға көмектесетін сертификаттар ұсынады.
Сондай-ақ Makerspace алаңында Ambassadors бағдарламасы белсенді түрде жүзеге асырылуда. Бұл бағдарламада тәжірибелі қатысушылар мен волонтерлер ғылым мен технология туралы білімді таратады. Олар өз курстарын Makerspace жоқ жақын елді мекендерде өткізіп, оқушылар мен жастарға мүмкіндік беріп жүр. Қазір бағдарламаға жаңа қатысушылар қабылдануда — Makerspace қозғалысының белсенді мүшесі болуға дайын барлық жастар шақырылады.
SKO Hub тағылымдамасы аясында төмендегідей клубтар құрылып, іске қосылды:
- Ағылшын тілі клубы – сөйлеу мен көпшілік алдында сөйлеу дағдыларын дамыту;
- Экономика клубы – бизнес пен қаржыға қызығушылық танытқан жастарды біріктіру;
- Үстел ойындары клубы – логикалық ойлау мен топтық әрекетті дамыту;
- Дизайн клубы – визуалды құралдармен жұмыс істеу және нақты жобаларға қатысу.
«Тағылымдаманың маңызды бөлігі — бұл менторлардың тұрақты қолдауы. Қатысушылар хаб пен креативті орталықтың резиденттерімен тығыз байланыста жұмыс істейді. Бұл оларға технология, бизнес және креативті индустриялардағы нақты процестерді көруге мүмкіндік береді. Мұндай тәсіл арқылы қатысушылар кәсіби hard-skills пен soft-skills дағдыларын қатар дамытады», – дейді SKO Hub өкілдері.
12-сынып оқушысы Томирис өз әсерімен бөлісті:
«SKO Hub-та тағылымдаманы бастағанда кәсіби даму үшін осынша мүмкіндік болатынын елестете алмадым. Мұнда өте талантты әрі креативті жастар жиналған. Олар үнемі көмек қолын созуға дайын. Сонымен қатар орталық әкімшілігі резиденттерде тағылымдамадан өтуге жиі мүмкіндік береді. Осылайша мен SMM және бейнемонтаж салаларында тәжірибе жинап жүрмін», – дейді ол.
СКУ-дың 1-курс студенті Александр да орталыққа алғысын білдірді:
«Мұнда келген сәттен бастап шабыттанасың. Ұйымдастыру деңгейі өте жоғары: бәрі нақты, ыңғайлы және жайлы. Әкімшілікке ерекше алғыс – өз ісін шын жүректен атқаратын мамандар. Әрбір жоба мен шара мұқият ойластырылған. Команданың нәтижеге жұмыс істейтіні бірден көрініп тұр», – дейді Александр.
Ал алынған дағдыларды бекіту үшін белсенділер Алмат Жанақов пен Асимa Шәріпбаева Tech Future Hackathon атты технологиялық хакатон өткізуді ұсынды. Оның тақырыбы — тағылымгерлерге арналған мобильді немесе веб-қосымша әзірлеу. Бұл қосымша арқылы жеке рейтинг жүргізу, тапсырмаларды басқару, менторлардан кері байланыс алу және прогресті бақылау мүмкін болады.
«Бұл шешім бағдарламаның ішкі құралы ғана емес, тағылымгерлердің портфолиосын толықтыратын құралға айналды. Ол жоғары оқу орындарына түсу мен жұмысқа орналасу мүмкіндігін арттырады», – деді SKO Hub өкілдері.
Хакатонды ұйымдастырушылар — SKO Hub, Maker Space және Qyzyljar Creative Center. 15 командадан 65-тен астам адам жобаға қатысты. 48 сағат ішінде қатысушылар MVP-жобаларды жасап, менторлармен кеңесіп, нәтижелерін қазылар алқасына ұсынды.
Қатысушыларға интернетпен жабдықталған жұмыс орындары, менторлық қолдау, демалыс аймақтары мен цифрлық және басқарушылық дағдыларды дамытуға арналған интенсивті бағдарлама ұсынылды.
«Мен Булаево қаласынан командаммен келдім. Біздің өнім өміршең және тағылымгерлерге де, жұмыс берушілерге де пайдалы болмақ. Хакатоннан алған әсерім өте жағымды. Барлығы өте жақсы ұйымдастырылған», – деді қатысушы Ернар Сарғызов.
Жобалар төрт критерий бойынша бағаланды: техникалық орындалуы, функционалдығы, презентациясы және пайдалану ыңғайлылығы (UX-дизайн). Жеңімпаз командалар портфолиоға арналған ұсыныстар, сарапшылардың пікірлері мен жобаларын әрі қарай дамыту мүмкіндігіне ие болды.
