Астана мектеп білімінің цифрлық трансформациясын талқылайтын орталыққа айналады – XIV NIS Conference 2025
2025 жылғы 30–31 қазанда Қазақстан астанасында «Назарбаев Зияткерлік мектептері» дербес білім беру ұйымының ең ірі халықаралық конференциясы – XIV NIS Conference 2025 өтеді. Биылғы конференцияның басты тақырыбы – «Цифрлық дәуірдегі мектеп білімі: негізгі трендтер мен сын-қатерлер», деп хабарлайды QZ News.
Ауқымды педагогикалық іс-шара әлемнің түкпір-түкпірінен жиналатын мұғалімдерді, зерттеушілерді және білім беру саласының жетекші мамандарын біріктіреді. Конференцияға АҚШ, Ұлыбритания, Нидерланд, Финляндия, Аустралия, Гонконг елдерінен және қазақстандық мектептер, жоғары оқу орындары мен ғылыми-зерттеу институттарының өкілдері қатысады деп күтілуде.
Конференцияда мектеп білімін цифрландыруға қатысты ең өзекті мәселелер қарастырылады: жаңа оқыту әдістемелерін енгізу, оқушылардың цифрлық сауаттылығын арттыру, PISA 2025 аясындағы дағдыларды бағалау, сондай-ақ білім беру процесінде жасанды интеллектіні (ЖИ) қолданудың мүмкіндіктері мен қауіптері. Қатысушылар мұғалім рөлінің цифрлық трансформация жағдайындағы өзгерісін де талқылап, өскелең ұрпақты оқыту мен тәрбиелеудегі үздік әлемдік тәжірибемен бөліседі.
XIV NIS Conference 2025 аясында заманауи цифрлық шешімдер, озық оқу ресурстары, инновациялық білім беру платформалары мен мектеп біліміне арналған ең жаңа әзірлемелер ұсынылатын EdTech көрмесі өтеді. Конференция қатысушылары технологиялық жаңалықтармен тікелей танысып, әзірлеушілермен тәжірибе алмаса алады және өз педагогикалық қызметіне тиімді енгізуге болатын практикалық құралдарды таба алады.
NIS халықаралық конференциясы дәстүрлі түрде білім беру саласындағы білім, озық тәжірибе және инновациялық идеялармен алмасудың беделді алаңы ретінде танылған. Конференцияға қатысу – әрбір педагог үшін әлемдік сарапшылардың баяндамаларын тыңдап қана қоймай, цифрлық дәуірдегі мектеп білімінің даму бағыттарын айқындайтын жаһандық білім беру қауымдастығының бір бөлігі болуға тамаша мүмкіндік.
XIV NIS Conference 2025 туралы толық ақпарат пен тіркеу ресми сайтта қолжетімді: https://beyim.edu.kz/conference