Тимирязев ауданында мәдени-сауықтыру орталығы ашылды

СҚО әкімі Ғауез Нұрмұхамбетов Тимирязев ауданында болып, ауыл шаруашылығы, өндірістік және әлеуметтік нысандарды аралады, деп хабарлайды QZ Media тілшісі.

Дмитриевка ауылында тұрғындарға арналған жаңа мәдени-сауықтыру орталығы ашылды. Мұндай нысандар Ақсуат және Степное ауылдарында да салынды.

«Райт-АА» серіктестігі Ақжан ауылында жаңа сүт фермасын салуда, инвестиция көлемі 1,7 млрд теңгені құрайды. Ал Ақсуат ауылында «Куанышбек и К» серіктестігі ұн және кебек өндіретін ұн тарту кешенін салды. Диқандармен кездесіп, “Москворецкое” серіктестігінің қызметімен танысты.

Тимирязево ауылында ішкі жолдар жөнделіп жатыр. Биыл аудан орталығында ұзындығы 8,9 шақырым жол жөнделеді. Екі жылда 20 астам көше қамтылмақ. Сондай-ақ Хмельницкое, Дружба ауылдарына апаратын жолдар да жөнделуде. Тимирязево-Целинное-Докучаево, Ишимский-Ақсуат ауылдары арасындағы жол да жаңартылады.

Ауылдықтар мемлекеттік көмек шараларын белсенді қолдануда. Тұрғын Назгүл Көбеева «Ауыл аманаты» бағдарламасының арқасында азық-түлік дүкенін ашты.

Сапар барысында өңір басшысы Тимирязев ауданының тұрғындарымен кездесу өткізді. Өзекті мәселелер мен оларды шешу жолдары талқыланды. Қазір аудандық аурухана мен 5 білім нысаны күрделі жөндеуден өтуде. Сондай-ақ аудан орталығында орталық қазандықтың құрылысы басталады.

Сондай-ақ “Таза Қазақстан” акциясы аясында Тимирязев саябағында Ғауез Нұрмұхамбетов ардагерлер және жастармен бірге ағаш көшеттерін отырғызды.