СҚО бірінші орынбасары Мамлют және Жамбыл аудандарында егін жинау науқаны мен аграрийлердің жұмысын тексерді
Солтүстік Қазақстан облысы әкімінің бірінші орынбасары Марат Тасмағанбетов жұмыс сапарымен Мамлют ауданында болды. Ол аудан әкімі Елена Степаненкомен бірге «Agrimer Mamlutka» ЖШС элеваторын аралап, астық қабылдау барысын және егіс алқаптарындағы орақ жұмыстарын қадағалап, механизаторлармен және шаруашылық басшыларымен әңгімелесті, деп хабарлайды QZ NEWS.
Алқаптардың бірінде Жамбыл ауданының әкімі Азамат Бектасовпен бірге ауыл шаруашылығы тауарын өндірушілермен кездесу өтті.
Жеке назар диверсификацияға аударылды. Шаруашылық жетекшілері майлы және бұршақты дақылдар үлесін арттыру, ылғал үнемдейтін технологияларды енгізу және техника паркін жаңарту жөнінде баяндады. Осы орайда облыс әкімінің бірінші орынбасары Президент айқындаған басымдықтарды еске салды.
«Егіс алқаптарын әртараптандыруды, рентабельді әрі жоғары өнімді дақылдарды өсіруге басымдық беруді жалғастыру қажет», — деп Қасым-Жомарт Тоқаевтың жуырдағы сөзінде айтылған болатын.
Кездесулер конструктивті түрде өтті: агроөнеркәсіп кешенін дамыту бағыттары белгіленіп, билік пен агробизнес арасындағы тығыз ынтымақтастықтың маңызы атап өтілді. Бұл тәсілдер Мемлекет басшысының агросекторға биылғы маусым мен келер жылға қойған міндеттерімен үндес. Алдағы басты мақсат — орақ науқанын оңтайлы мерзімде аяқтау.
Жедел мәліметтерге сәйкес, 28 қыркүйекке қарай өңірде дәнді және дәнді-бұршақты дақылдардың 2,2 млн гектары жиналды — бұл жалпы егіс алаңының 72%-ы. Орташа өнімділік гектарына 17,6 центнерден шығып, 3,8 млн тонна астық бастырылды.
