Энергетик Валерий Шукаев: «Біздің мамандық әрқашан сұранысқа ие болады»
July 30, 2025 10:14
Энергетик Валерий Шукаевтың айтуынша, бұл сала ешқашан маңызын жоғалтпайды. Валерий саналы түрде электромонтер мамандығын таңдаған. Себебі бұл жұмыста үнемі тәжірибе жинақтап, кәсіби тұрғыда дамуға мүмкіндік бар, деп хабарлайды QZ NEWS «Севказэнерго» АҚ-қа сілтеме жасап.
Биіктікте жұмыс істеу — үлкен физикалық төзімділікті талап етеді. Себебі ауа райының кез келген жағдайында: аптап ыстық, қатты аяз, дауылды жел немесе нөсер жауын кезінде де жұмыс істеуге тура келеді. Мұндай қиын жағдайда құрал-саймандарды шебер қолдану ғана емес, сонымен қатар қауіпсіздік техникасын бұлжытпай сақтау өте маңызды.
«Менің басты міндетім – жабдықтың үздіксіз жұмыс істеуін қамтамасыз ету. Біздің бөлім әуе электр желілерін толықтай күтіп ұстауға жауапты: біз сымдарды тартамыз, апат салдарын жоямыз, жөндеу жұмыстарын жүргіземіз және тіректерді ауыстырамыз», – дейді Валерий.
Әуе желілерінің электромонтерлері әрқашан командамен жұмыс істейді. Сондықтан әріптестер арасында толық түсіністік пен сенім болуы тиіс. Сонымен қатар кез келген төтенше жағдайға дайын болу – басты талап.
«Физикалық жүктемеге үйреніп кетуге болады, – дейді Валерий, – ал тұтынушылар әртүрлі. Сол себепті адамдармен ортақ тіл табыса білу, сабыр сақтап, кәсіби деңгейде сөйлесу маңызды. Күрделі процестерді қарапайым әрі түсінікті тілмен түсіндіре білу қажет».
Энергетика саласы үздіксіз дамуда, сондықтан Валерий жас мамандарға заманауи жаңалықтардан қалыс қалмай, сұрақ қоюдан қорықпауға және кәсіптегі жаңашылдықтарға үнемі қызығушылықпен қарауға кеңес береді.
Валерийдің кәсіби жолындағы жарқын сәттердің бірі — Қызылжар РЭС аумағында өткен «Орталық Азия Электржелілік Компаниясы» АҚ-ның жедел-жөндеу персоналы арасындағы кәсіби жарыс болды. Биыл Валерий мүше болған «Солтүстік Қазақстан РЭК» АҚ-ның бригадасы бұл байқауда бірінші орынды иеленді. Ал Қырғызстанда өткен халықаралық жарыстан қазақстандық энергетиктер күміс жүлдемен оралды.