Тұрмыстық мәселеден бастап киберқауіпсіздікке дейін: Бескөлдегі жаңа учаскелік инспектор тұрғындармен байланыс орнатуда
Бескөл ауылында жаңа учаскелік полиция инспекторы, полиция капитаны Бахтияр Садуов қызметіне кірісті. Оның жұмысы – ауылдағы қауіпсіздікті нығайтып, халықпен сенімді қарым-қатынас орнатуға бағытталған. Қызметі тұрмыстық даулардан бастап кибералаяқтықтың алдын алуға дейінгі мәселелерді қамтиды, деп хабарлайды QZ NEWS.
Капитан Садуовтың жұмыс күні азаматтарды қабылдаудан басталады. Тұрғындар оған түнде мотоциклдердің дауысы, қаңғыбас иттерге шағым, жол белгілерін орнату сынды түрлі өтініштермен жүгінеді. Қабылдау полиция бөлімшесінде ғана емес, әкімдік ғимаратында да өткізіледі. Бұл – жергілікті қызметтермен тиімді өзара іс-қимыл жасауға мүмкіндік береді.
Ол 4700-ден астам тұрғыны бар аумаққа жауапты. Жағдайды жақсы түсініп, сенім орнату мақсатында күнделікті түрде үй-үйді аралап, тұрғындармен тілдеседі. Ерекше көңіл аударылатындар – тек есепте тұрғандар ғана емес, әлеуметтік осал топтар: жалғызбасты зейнеткерлер, аз қамтылған отбасылар мен көмекке мұқтаж жандар. Мысалы, оның учаскесінде 67 жалғызілікті зейнеткер тұрады. Капитан Садуов олардың барлығына барып, өз байланыс нөмірін қалдырып, тұрмыстық жағдайымен жеке танысуды жоспарлап отыр.
Құқықбұзушылықтардың басым бөлігі аула мен үй маңын абаттандыру ережелерінің бұзылуымен байланысты. 2021 жылдан бастап ауылдық жерде қызмет етіп келе жатқан Садуов мұндай жайттарға тез әрекет етіп, тұрғындарға заң талаптарын түсіндіреді.
Сонымен қатар, ол ақпараттық-профилактикалық жұмысқа да белсене атсалысады. Аула аралау кезінде тұрғындарға интернет-алаяқтықтан қорғану жөнінде жадынамалар таратып, күмәнді қоңыраулар мен «банк қызметкерлерінен» сақ болуды ескертеді. Кибершабуылдарға қалай әрекет ету керектігін де түсіндіреді. Капитан Садуов түнгі патрульге, халықпен кездесулерге, шұғыл шақыртуларға және жедел-профилактикалық шараларға да қатысады.
Жұмыс кестесінің тығыздығына қарамастан, Бахтияр Садуов өз қызметіне үлкен жауапкершілікпен қарайды.
«Мен үшін ең маңыздысы – жұмысымның адамдарға пайда әкелуі. Кішкентайымнан қоғамға көмектесуді армандадым, ал полицияда қызмет ету – қауіпсіздік пен тәртіпті қамтамасыз етудің бір жолы. Бұл жай ғана мамандық емес, бұл – менің өмірлік миссиям», – деді полиция капитаны.