Петропавлда Мағжан Жұмабаев мұрасын зерттейтін алғашқы мәдени-ағартушылық орталық ашылды

Петропавлда салтанатты жағдайда «Мағжан орталығы» ашылды. Бұл – Мағжан Жұмабаевтың мұрасын зерттеуге арналған алғашқы мәдени-ағартушылық орталық. Ашылу рәсіміне ҚР Премьер-Министрінің орынбасары Ермек Көшербаев, СҚО әкімі Ғауез Нұрмұхамбетов, өңірдің шығармашылық және ғылыми қауым өкілдері қатысты, деп хабарлайды QZ NEWS.

Қала тұрғындарына «Қалыңдық үйі» ретінде белгілі тарихи ғимаратта бүгін Мағжан орталығы есігін айқара ашты. Бұл кеңістік қаланың креативті және білім беру өмірінің жүрегіне айналмақ. QZ NEWS «Мағжан орталығының» ішкі келбетін көрсетеді

Орталықта ақынның жұмыс кабинеті бар. Экспозиция Мағжанның тұрмыста қолданған заттары, әдеби мұрасы, көркем шығармашылығы негізінде жасалған. Мұнда жазу машинкасы, кітаптар, фотосуреттер, құжаттар, жеке бұйымдар және өзге де жәдігерлер ұлы ағартушының педагогикалық идеяларын паш етеді.

Сондай-ақ орталықта семинарлар, кездесулер, пікірталастар, презентациялар және түрлі іс-шаралар өтетін конференц-зал бар.

Мағжан кітапханасы ерекше назар аударарлық. Мұнда Жұмабаевтың шығармалары, баспа кітаптар, белгілі ақын-жазушылардың туындылар галереясы, сондай-ақ оқу, ақпарат іздеу және әдеби кештер өткізуге арналған алаң бар.

Бұдан бөлек, архивтік құжаттарды зерттеу кабинеті, «Мағжан» әдеби-көркем және қоғамдық-саяси журналының редакциясы, «Мағжантану» жастар әдеби клубы орналасқан.

Ұйымдастырушылардың айтуынша, Мағжан орталығы есігі барлық адамға – мектеп оқушыларынан бастап тәжірибелі авторлар мен суретшілерге дейін – ашық. Мұнда әдеби кештер, музыкалық перформанстар, дәрістер өтіп, ең бастысы – Петропавлдың мәдени картасын өзгертетін жобалар дүниеге келеді.

Айта кету керек, «Мағжан орталығы» – ұлы жерлеске құрмет қана емес, сонымен бірге болашаққа, жастардың, өнердің және идеялардың дамуына салынған инвестиция.