Соңғы бес жылдағы ең қуатты магниттік дауылдардың бірі аяқталды

Жерде соңғы 5 жыл ішіндегі ең қуатты магниттік дауылдардың бірі тоқтады. Ол 42 сағатқа созылып, осы кезеңдегі қарқындылығы жағынан екінші орынға шықты, деп хабарлайды QZ NEWS XRAS күн астрономиясы зертханасының мәліметіне сүйеніп.

«Геомагниттік дауыл 42 сағатқа созылып, биылғы жылғы ең күштісі болды. Геомагниттік индекстердің жеткен мәндері тұрғысынан алып қарағанда, қазіргі 25-ші күн циклі барысында дауыл деңгейі G4.7 және одан жоғары болған үш жағдай тіркелді. Олардың ішінде, әрине, 2024 жылдың 10–12 мамырында болған ең жоғары деңгейлі G5.0 дауылы бар. Екінші орында – жаңа ғана аяқталған оқиға, ал үшінші орында 2024 жылдың 10–11 қазанында болған дауыл. Ол да дәл сондай шыңдық көрсеткіштерге жеткенімен, ұзақтығы қысқа болды. Ал осы циклдің қалған оқиғалары, яғни кемінде 2020 жылдың басынан бері, әлдеқайда төмен шекті мәндерге ие болды», – делінген хабарламада.

Зертханада атап өткендай, күн желінің жылдамдығы әлі де жоғары – шамамен секундына 600 км, бұл қалыпты көрсеткіштен бір жарым есе көп. Магниттік дауыл Техас, Флорида және Калифорния штаттарында солтүстік шұғыласының пайда болуына себеп болды. Яғни әдетте мұндай табиғи құбылыс кездеспейтін өңірлерде байқалды.

Қазіргі уақытта Жерге күннің тыныш аймағы қарама-қарсы орналасуда, бұл кемінде бір аптаға, тіпті екі аптаға дейін тынығуға мүмкіндік береді деген үміт бар.