СҚО құтқарушылары кәсіби мерекеге орай мемлекеттік және ведомстволық наградалармен марапатталды
Солтүстік Қазақстан облысының Төтенше жағдайлар қызметінің қызметкерлері мен ардагерлері кәсіби мерекелерін Сәбит Мұқанов атындағы облыстық театрда атап өтті. Салтанатты шара солтүстікқазақстандықтардың қауіпсіздігі мен өмірін қорғау жолында еңбек етіп жүрген мамандардың басын қосты, деп хабарлайды QZ NEWS тілшісі.
Залда жылы әрі мерекелік көңіл күй орнады. Әріптестер бір-бірін құттықтап, сала ардагерлері естеліктерімен бөлісті. Ал жас қызметкерлерге еңбектері үшін алғыс айтылды.
Кештің басты оқиғасы – үздік нәтиже көрсеткен құтқарушыларды марапаттау рәсімі болды. Оларға арнайы атақтар, төсбелгілер, медальдар мен құрмет грамоталары табысталды.
«Бұл залдағы әрбір марапат – жай ғана ерекшелік белгісі емес. Ол күнделікті еңбектің, жауапкершіліктің және кез келген сәтте көмекке келуге дайын болудың нәтижесі», – деп атап өтті департамент басшысы.
Салтанатты рәсімде қызметтік міндетін атқару кезінде қаза тапқан қызметкерлердің отбасыларына да ерекше көңіл бөлінді. Оларға қолдау көрсетіліп, ерлікпен қаза тапқан батырлардың рухына бір минут үнсіздікпен тағзым етілді.
«Біз өзгелерді құтқару жолында өмірін қиған жандарды ешқашан ұмытпаймыз. Олардың отбасыларына қамқорлық көрсету – біздің парызымыз әрі азаматтық борышымыз», – деп атап өтті сөз сөйлегендердің бірі.
Мереке аясында өрт қауіпсіздігі тақырыбындағы мектеп оқушылары арасында өткен бейнероликтер байқауының қатысушылары да марапатталды. Байқауға Петропавл қаласындағы №7, №25 және №43 мектептердің оқушылары қатысты. Жасөспірімдер шығармашылық жұмыстар арқылы қауіпсіздік ережелерін сақтаудың және өрттің алдын алудың маңыздылығын көрсетті.
«Оқушылардың қауіпсіздік мәселесіне байыппен қарайтыны қуантады. Бүгін олар бейнеролик түсірсе, ертең арамызға қосылып, әріптесімізге айналуы да мүмкін», – деп пікір білдірді ведомство өкілі.
Кеш соңы әсерлі концерттік бағдарламаға ұласты. Шығармашылық ұжымдар жиналғандарға ән мен биден шашу шашып, көрермендер әр өнер көрсетілімін жылы қабылдады.
Мерекеге орай ұйымдастырушылар әріптестеріне зор денсаулық, отбасыларына амандық пен береке тілеп, әрбір шақырту сәтті аяқталсын деген ізгі тілектерін жеткізді.