«Өткен күннің резонансты істері»: 1997 жылы петропавлдық жүргізушілерді қатыгездікпен өлтірген қылмыстық топ қалай жазаланды
Редакциямыз «Өткен күннің резонансты істері» айдарын жалғастырады. Бұл жолы сөз болатын қылмыстық іс Солтүстік Қазақстан облысы полиция департаменті музейінің архивінде сақтаулы. 1997 жылы Петропавл қаласының жүргізушілеріне қарақшылық шабуыл жасап, адам өлтірген қылмыстық топқа қатаң үкім шығарылған болатын, деп хабарлайды QZ NEWS тілшісі.
Оқиға 1997 жылдың 23 ақпанында басталды. Бұған дейін бірнеше рет сотталған Ленин ауданының тұрғындары А.С. мен В.С. Қостанай қаласындағы колония-қоныстан қысқа мерзімді демалыс алып, Петропавл теміржол вокзалы алаңына келеді. Спирттік ішімдік ішіп, ақшасыз қалған олар үйлеріне жолай өтетін көлікпен жетуді ұйғарады. Алғашқы жүргізуші олардың мас күйде болғанын көріп, жолға шығарудан бас тартады. Бұған ашуланған күдіктілер «Бескөлге дейін жеткізіп тастасаңыз, ақысын төлейміз» деп күміс түсті «Audi-80» автокөлігінің жүргізушісі А.М.-мен келіседі.
Іс материалдарына сәйкес, жолаушылардың жол ақысын төлеуге қаражаты болмаған және олар алдын ала қылмыс жасауды жоспарлаған. Архивтік құжаттардағы А.С.-ның жауабына қарағанда, қала маңындағы ауылға жеткен кезде жүргізуші әрі қарай барудан үзілді-кесілді бас тартқан. Сол сәтте В.С. пышақ шығарып, ер адамға бірнеше рет соққы жасаған. Қылмыстың ізін жасыру үшін шабуылдаушылар марқұмның денесін туған ауылдарына қарай алып кетіп, бөлшектеп, дене қалдықтарын қала маңындағы әртүрлі жерлерге жасырған. Кейін олар көлікті иемденіп, құжаттардағы фотосуреттерді ауыстырып, бір ай бойы ұрланған автокөлікпен облыс аумағында еркін жүрген.
Жазасыз қалатынына сенген қаскөйлер наурыз айында жаңа қылмыс жасау үшін 1965 жылы туған үшінші сыбайласын қатарларына қосады. Олар бұрынғы тәсілмен вокзал алаңынан А.К. есімді жүргізушіні жалдап, оны Асаново ауылына дейін жеткізу үшін 500 теңге төлеуге уәде берген. Жол үстінде ер адамды тұншықтырып өлтіріп, мәйітін қар басқан алқапқа жасырған. Кейін ұрланған жеңіл көлік кездейсоқ бұзылып қалған соң, оны бөлшектеп, қосалқы бөлшектерін әр жерге жасырған.
Қылмыстық топтың ізіне кездейсоқ жағдайдың арқасында түсу мүмкін болды. 1997 жылдың 7 мамырында алғашқы құрбанның жұбайы қала көшелерінің бірінен іздеуде жүрген «Audi-80» көлігін байқап қалады. Рөлде ұрланған көліктің жаңа сатып алушысы отырған. Әйел бірден құқық қорғау органдарына хабар берген. Сол күні полиция қызметкерлері көлікті тоқтатып, күдіктілердің ізіне шыққан.
1997 жылғы 8 мамырда сот айыпталушыларды кінәлі деп таныды. Қатыгез кісі өлтірулерді ұйымдастырған А.С. мен В.С. сол кездегі ең жоғары жаза – ату жазасына кесілді. Үшінші сыбайласы 15 жылға бас бостандығынан айырылды. Ал дәлелдерді жасыруға қатысқан сотталғандардың бірінің кәмелетке толмаған інісі 3 жылға сотталды.