Қазақстанда ауыл шаруашылығы санағының ең ауқымды екінші кезеңі басталды

20 қыркүйекте Қазақстанда ауыл шаруашылығы санағының екінші кезеңі басталды. ҚР Стратегиялық жоспарлау және реформалар агенттігі Ұлттық статистика бюросының интервьюерлері елдің барлық елді мекендерінде үйлерді аралап жүр. Жоспар бойынша шамамен 1,5 млн үй шаруашылығынан сауалнама алынады, деп хабарлайды QZ NEWS.

Бұл ауқымды кампанияның мақсаты – аграрлық саланың қазіргі жағдайы туралы толыққанды мәлімет алу, әсіресе ауылдар мен ауылдық округтер деңгейінде.

Бұған дейін, 1 тамыздан бастап, онлайн-кезең өткен болатын. Оған 600 мыңнан астам респондент қатысқан. Енді деректер дәстүрлі әдіспен жиналады: планшеттермен жабдықталған интервьюерлер үйлерді аралайды.

– Біз барлық тұрғындарды белсенді қатысуға және өзекті ақпарат беруге шақырамыз. Сұрақтар қарапайым, тек ауыл шаруашылығы қызметіне қатысты. Барлық жауаптар тек статистикалық мақсатта пайдаланылады және үшінші тұлғаларға берілмейді, – деп атап өтті Бюро басшысы Мақсат Тұрлыбаев.

Үй аралау жұмыстарына 2,5 мыңнан астам интервьюер тартылған. Оларды арнайы көк түсті формасынан – жилет пен бас киімінен сондай-ақ QR-коды бар бейджінен оңай тануға болады. Егер үйде ешкім болмаса, интервьюер байланыс деректері көрсетілген хабарлама қалдырады.

Ұлттық статистика бюросы ақпараттың қауіпсіздігі мен құпиялылығына кепілдік береді. Барлық жауаптар заңмен қорғалады және тек жасырын түрде қолданылады. Егер сұрақтарыңыз туындаса, 1446 нөмірлі байланыс орталығына таңғы 9:00-ден кешкі 21:00-ге дейін хабарласуға болады. Қоңырау тегін.

Санақ 20 қазанға дейін жалғасады. Жиналған деректер ауыл шаруашылығы туралы мәліметтерді нақтылап, оны дамытуға бағытталған маңызды мемлекеттік шешімдер қабылдауға негіз болады.